uMthunywa
Nkosilathi Sibanda
UMANDLA Mpofu uthe umdlalo weHighlanders leDynamos ubungowokulungisisa iqembu ngakho akumelanga abalandeli batshaywe ngamakhanda ngokunqotshwa.
“Sibe lomnyama kodwa bekungumdlalo osinikeze intshukuntshu yokulungisisa iqembu,” kutsho lumqeqetshi weHighlanders.
IBosso inqotshwe 2-0 yiDynamos kunkezo kaZibuse ngeSonto.
UMpofu ongene kulumdlalo ngemva kokuqoqa iqembu lakhe okwamalanga amahlanu, ubika ukuba ukunqotshwa akutsho ukuthi ithimu ifile.
“Kuyangithabisa ukuthi abafana bayalichaya ibhola. Ngokuya kwesikhathi lizajiya iqembu.”
Umqeqetshi lo uvumile ukuthi udaniswe ngunozinti wakhe uAriel Sibanda lemvimbi uPeter Muduhwa.
“Yebo sibanikeze amabhola amahala, elinye livela kukaputeni wami lelinye kumdlali omkhulu.
“Izinto ziyajika kunguqu.”
Kubadlali abakhange ababukeli bomdlalo yilabo abakade bedlala besesiswini senkundla uWinston Mango, uNqobizitha Masuku loRyan Lunga.
UMhango obenchinsa ukugqoka ezeBosso utshengise ukuthi uyakwazi ukulifikisa enyaweni ibhola. Umdlali lo ungene kuBosso eloJoel Josta Ngodzo, Crispen Ncube loPritchard Mphelele.
Umqeqetshi uthe uyasuthiseka ngabadlali baphakathi kodwa kuzamele aqine ngabaphambili.
Kusenjalo iqembu libuyele kuhlelo lwayo lokulolonga koBulawayo kusalindwe ukuqalisa komncintiswano mhlaka 15 ngenyanga ezayo.
