YiNtatheli kaMthunywa
ABAGIJIMI bomjaho we-200m beZimbabwe uTapiwanashe Makarawu kunye loMakanakaishe Charamba baphakamise ifulegi yesizwe izolo eStade de France kulandela ukwenelisa ukudlulela kuma-semi-finals eParis 2024 Olympic Games.
Ababili laba abangene kumqhudelwano wabesilisa we 200m baphume bengabesibili kumncintiswano eyehlukeneyo.
Ongene kuqala enkundleni nguCharamba owenelise ukuqeda i-200m ngemizuzwana engu 20.27 elandela ngemva komgijimi weBotswana uLetsile Tebogo oqede nge-20.10.
Ngemva kwabo kulandele owe-Italy uFlippo Tortu oqede nge-20.29.
Ekhuluma lentatheli uCharamba ogijime esebenzisa umzila wesine uthe loba engatholanga umzila awuthandayo kodwa ulokujabula.
“Loba bengingatholanga umzila omuhle kodwa ngenelisile ukugijima kuhle ngaphumelela.
“Ngikhangelele ukuthi ngenze kuhle futhi kuma-semi finals ngenelise ukuya kuma-finals. Ngiyajabula lapha. Akukho okumangalisayo engikukhangeleleyo kodwa ngifuna ukuzikholisela,” kutsho uCharamba.
UMakarawu ungene kumncintiswano wesihlanu, yena ugijime esemzileni wesithathu. UMakarawu wenelise ukuqeda umjaho ofanayo ngemva kwemzuzwana engu-20.07 okwenze laye wenelisa ukungena kuma-semi finals.
Ohambe phambili kulumncintiswano ngu-Erriyon Knighton we-United States oqede umjaho ngemva kwemzuzwana engu-19.99 kukanti iSouth Africa ibe ngeyesithathu imelwe ngu-Shaun Maswanganyi oqede nge-20.20.
UMakarawu ubekubeke kwacaca ukuthi ufuna ukungena kuma semi-final engazange aphinde umjaho.
“Bekungumjaho omuhle. Inhloso yami bekuyikufica lo obegijima emzileni oseceleni kwami, ngikwenelisile lokhu. Ngiyaziqhenya ngomsebenzi wami kunye lomqeqetshi wami,” kutsho uMakarawu.
Abagijimi abathathu kumncintiswano munye ngamunye yibo abenelisa ukungena kuma-semi finals azakubakhona kusasa bengazange baphinde.
