uMthunywa
Nkosilathi Sibanda
UMQEQETSHI owenze kuhle ukwedlula bonke kumidlalo emithathu esidlaliwe kuligi yeCastle Lager kungaba nguNation Dube oweHwange.
UDube usekhuze iqembu leli lisuka ezikwakweni zika-Division One lapho atshiye ebuthelele imiklomelo yonke, okutsho ukuba iHwange isiqede imidlalo eyedlula amatshumi amabili inganqotshwa.
IChipangano itshikilisana leChicken Inn phezulu kwelogu loba nje amaGamecocks ephambili ngenxa yokuhlohla amabhola amanengi.
Okwenza iHwange ibonakale yikuthi ivela ku-Division One njalo bekungela abalandeli bomdlalo abayinikeze ithuba lokudlala kuhle.
Ukunqoba iDynamos kumaviki amabili adluleyo kukhukhumeze idlabuzane lequla labadlali beHwange, inengi labo elingaziwayo kunguqu.
Ihube ngenjabulo inkamba yabadlali laba kulandela ukunqoba futhi phezulu kweNgezi Platinum nge 2-1.
Sekuvela ukuthi kumidlalo ezayo, kuzakuba ngumthwalo kwamanye amaqembu ukuthi abambe uNation labadlali bakhe.
Osaziwayo kwezokuhlaziywa kwenguqu bavumelana ukuthi iHwange liqembu elizadonsa amehlo, ikakhulu nxa ingaqhubeka idlala kuhle.
U-Alois Bunjira uthe kubo bonke abaqeqetshi, uDube usetshengise ukuba uyazi akuqophileyo kuPSL.
“Kuliviki ngitshayela uNation Dube ihlombe. Nangu umqeqetshi othethe iqembu phansi waliphakamisa ngesikhathi kungela ocabangelayo. Sizabona okunengi kulisizini, abaqhubeke kuhle,” nguBunjira lo.
Uqhubeke wathi umqeqetshi lo kusegcekeni ukuthi ukhaliphile kwezenguqu ngoba ngokunqoba kwakhe, usethole inhlonipho kwabanye abaqeqetshi kuligi ephakemeyo.
“Umqeqetshi lo ulobuciko bokutshintsha umdlalo kungela ocabangela ukuthi uzanqoba.”
UMthunywa ukhulume loGerald Zulu, umgadli weHwange obike ukuba akulamqeqetshi ofana loDube.
“Ulolwazi lomdlalo engibona angathi akula omunye umqeqetshi ongamedlula,” kutsho lumdlali ekhuluma lephephandaba likazulu esenkundleni yeColliery kuliviki.
Kusenjalo, ezakoNtuthu, iBulawayo Chiefs izalinda kancane anduba idlale leBlack Rhinos kulandela ukumiswa kwemidlalo enkundleni yeNational Sports.
