Bazwa nge ‘Bosso’ kuChampions League

24 Aug, 2023 - 00:08 0 Views
Bazwa nge ‘Bosso’  kuChampions League uNqobizitha Masuku

uMthunywa

Nkosilathi Sibanda

ABADLALI abathathu abake baligiqa kuqembu leHighlanders, uCleopas Dube, Nqobizitha Masuku loDaniel Msendami benelise ukufinyelela inkundla ze-Caf Champions League lapho abatshiye imbali enhle ngokudlala kwabo.

Bobathathu laba badlalela iqembu leBotswana eleJwaneng FC, elinqobe iVipers ye-Uganda 2-0 enkundleni yeGaborone National Stadium, kumdlalo ovule umncintiswano lo, oqakathekiswa kakhulu kumaligi ase-Africa.

Abadlali laba baphakamise ibizo leqembu nanko kuyavela ukuthi “zikhandwa ziphelele” kwekaMatshobana.

Phakathi kwabo, uMsendami loDube bebechinsa ukuphatheka kuCaf Champions League. UMasuku wake wadlala kulelibanga ekuFC Platinum.

UMsendami ungene emdlalweni ngesigaba sesibili somdlalo, ngesikhathi iqembu lakhe likhokhela nge 1-0, ngemva kokuba lihlohlelwe nguThabang Sesinyi, ophinde waligaxa futhi emambuleni ngesikhathi esifanayo.

UMsendami udlale ngokuzikhandla njalo ujabulile ngendlela adlale ngayo.

“Ngithabile ekuthini ngifinyelele isigaba seChampions League. Lesi yisigaba esiphezulu kunguqu ye-Africa, ngakho ngizizwa ngiphakanyisiwe,” kutsho umdlalo lo ekhuluma lentatheli kaMthunywa ngemva komdlalo.

Umdlali lo, inengi labasekeli beBosso bazakhumbula ukuthi wangena eqenjini elikhulu elabadlali ababalisi u-Andrew Mbeba, Archiford Faira loVincent Moyo. Bonke baphakanyiswa ngumqeqetshi uMadinda Ndlovu ngesizini ka-2018.

UMasuku laye udlale kuhle esiswini senkundla.

UDube, owayedume ngokuthi ngu-Balotelli, uphoselwe emdlalweni ngesigaba sesibili, wafika wancedisa ngalokho akwenelisileyo.

UMasuku uthe uyathokoza ekuthini bobathathu badlale kuChampions League.

“Ngiyathokoza ngokuthi sobathathu sifike lapha. Sonke sidlale kuhle. Akulula ukufinyelela inkundla lezi.”

Kusenjalo, abadlali laba bazaphindela enkundleni zokulolonga sebelungiselela ukuya e-Uganda.

Impumela yemidlalo evule i-Caf Champions League:

Jwaneng Galaxy (Botswana) 2-0 Vipers SC (Uganda), UD Songo (Mozambique) 1-0 Green Mamba (Lesotho), ASAS (Djibouti) 0-2 Young Africans (Tanzania), Premiero de Agosto (Angola) 1-0 Vita Club (DRC), Otoho (Congo Brazzaville) 1-1 Al-Merrikh (Libya), Dragon FC (Equatorial Guinea) 0-2 Nyasa Big Bullets (Malawi), Kara (Togo) 0-1 Asfar(Morocco), Medeama (Ghana) 1-0 Remo Stars (Nigeria), Haifa FC (Cote d’ Vore) 0-0 Generation Foot (Senegal), FC Nouadhibou ( Mauritania)n 2-0 Al Ahly Tripoli (Libya), Al Ahly Benghazi (Libya) 4-3 Enyimba (Nigeria), Coton Sport (Benin) 0-0 ASEC Mimosas (Cote d’iVoire).

Share This:

Sponsored Links

Survey


We value your opinion! Take a moment to complete our survey

This will close in 20 seconds