uMthunywa
Nkosilathi Sibanda
UMJAHO omkhulu koBulawayo owe-PPC Matopos 33-miler ojwayele ukuba yibizabiza minyaka yonke, kungenzeka ugijinyelwe ngabantu abalutshwane lonyaka nanko phela sekukhwezwe imbhadalo yokugijima.
Inhlanganiso yeBulawayo Athletics Association ithe abalesifiso sokugijima i53km bazakhupha i$25 kuthi labo abaphatheka kumango oyi-21.1km bazakwehlukana le$20. Besekujwayelekile ukuthi kubhadalwe i$5 nje kuphela.
Umjaho lo uzakuba ngoMabasa.
Loba imali yokubhalisa isikhweziwe, umgcinisihlalo we-Bab uManuel Mpofu uthe abantu bazaphatheka kuphela.
“Sesivulile uhlelo lwethu lokwamukela labo abafisa ukuncintisa kumjaho wethu wePPC Matopos 33miler. Imali ezabhadalwa ngabagijimi ikhwelile kodwa angiboni ukuba ingasiphazamisa ukuthi kubuye abantu abanengi. Ngomnyaka odluleyo sedlulise inani labantu ebesicabangela ukuthi lizagijima, sikhangelele okufanayo.
“Ngiyazi ukuthi banengi abantu abafuna ukugijima lonyaka, yikho kumele abantu babhalise kuseselesikhathi sokulungiselela. Sinxusa bonke abazimiseleyo ukuthi bazencintisa kulumjaho osuqakathekile kumdlalo wokugijima eZimbabwe,” kutsho uMpofu.
UMpofu uthe umango omude owePPC Matopos 33-miler kubikwa usulandelwa linengi labagijima imango emide kuleli, okwenza umjaho lo uqakatheke kukhalenda yomdlalo wokugijima.
Inkampani yesamende iPPC Zimbabwe iqhuba umncintiswano lo ibambene lenhlanganiso ephethe umdlalo wokugijima kuleli eyeNational Athletics Association of Zimbabwe.
UMpofu uthe umjaho lo uzaqalisa emadabukakusa egedini lephakhi yeMatopo kuqondwe koBulawayo lapho abakhangelele ukuthi ozanqoba umdlalo atshaye intambo ngaphansi kwehola elilodwa.
Abagijimayo abakhangelelwe ukubakhona babalisa labo abaphuma koBulawayo loba nje bejwayele ukunqotshwa yilabo abavela khatshana. Kukhangelelwe ukuthi kuncintise lentshantshu zamathimu enhlanganiso zamapholisa, ogadijele lamasotsha.
Minyaka yonke nxa kuqhutshwa umjaho lo, inkampani yePPC Zimbabwe yandise ukuphathisa lomphakathi weMatopo. Ngomnyaka odluleyo, inkampani yePPC Zimbabwe yakha isikolo yaphinda yancedisa ukwakhiwa kwekilinika kulindawo.
