uMthunywa
Ethel Ncube
ZILOKHU zisankemile zikhakhamele izakhamizi zeNyamandlovu nanko phela kubikwa kulabotsikamutanda abafike khonale asebesungule indlela entsha yokuthungatha abathakathi besebenzisa izinja.
Izakhamizi zakulindawo ezizibonele limbedumehlwana isenzakala ekuqaleni kwayonale inyanga ziveze ukumangala ngezinja lezi esezisetshenziswa ukubamba abathakathi emini libalele.
Kucatshangelwa ukuba phakathi kwalabo ababanjwa yizinja lezi kwakulamalunga ebandla leSabatha okubikwa adonswa yizinja lezi zibasa entabeni lapho okwakulabotsikamutanda khona.
Ekhuluma lentatheli omunye umfakazi oxoxisane loMthunywa uSijabuliso Ndlovu uveze ukuba abazange babelenkani ukuthi amakholwa ahamba ebophele intebe.
“Otsikamutanda abahamba lezinja siyabaqala lapha. Izinja lezi zazihamba lapho abantu ababebuthene khona besonta zifike zidonse abantu zibase entabeni ukuze bayebahlahlula.
“Labo ababefika bedonswa yizinja babehle bakhitshwe imithi abayithweleyo abantu bonke bekhangele.
“Kayisizontebe zokudlala ezaphuma ebantwini ezinye zaziphefumula. Abanye balabo ababethwele okubi ngabantu abahloniphekayo. Badojwa abantu ngalelonga kwabaluthuli sokuphuma izinto ezitshiyeneyo,” kubika umfakazi lo.
Uqhubekele phambili esithi phakathi kwalabo ababanjwa belemithi kwakulamaSabatha amane.
Uqhubekele phambili eveza ukuba abantu basala bengelankani ngokwenzakala endaweni yabo.
“Ziqalisa ukufika izinja ebantwini sasicabanga ukuthi zilomuntu ezihamba laye kanti zizothatha abantu. Zazifika zime zikubhode zikunuke zibe sezikudonsela kuboTsikamutanda abebephezulu kwentaba. Esizakubona lapha izinja sezitshaya amathambo kunzima.”
Iphephandaba likazulu likhulume njalo loKhansila weNyamandlovu uDavid Moyo oveze ukuba kakezwa lutho ngezinyanga lezi.
“Udaba olunjalo belungakafiki endlebeni zami, ngizadingisisa ngakho,” kuphetha uKhansila Moyo.
