Bazayicela isivuthiwe

14 Jul, 2022 - 00:07 0 Views
Bazayicela isivuthiwe uJoey Antipas

uMthunywa

YiNtatheli kaMthunywa
ULALA engalele umqeqeqetshi weChicken Inn, uJoey Antipas kulandela ukunqotshwa kweqembu lakhe kumidlalo edluleyo.

Ubuthongo ubuswela ngenxa yokuthi wemukwe esikhundleni, iqembu lakhe lithathelwa inombolo kungalane yeligi yeCastle Lager. IChicken Inn ike yakhokhela okwamaviki amathathu kodwa yehluleka ukubambelela isinqotshwa njalonje ngamaqembu abalisa iFC Platinum leTenax.

Okwakhathesi amaGamecocks akunombolo yesibili ephethe imiklomelo engu-38 elandela iFC Platinum ele-43.

Ngendlela izimbamgodi zikaNorman Mapeza esezihuba ngayo ngokunqoba, akusoke kwabalula ukuthi u-Antipas abuyele phezulu.

uNorman Mapeza

Kulimpelaviki iChicken Inn inxuswe ngomakhelwane iBulawayo Chiefs enkundleni yeBarbourfields.

Zombili iChiefs leChicken Inn zibhekane lobunzima ngalesi isikhathi. Amakhosi lawo adinga usizo nanko asedlule imidlalo emithathu enganqobi.

IChiefs yacina ukunqoba ekuqaleni kukaNhlangula ize inqobe iYadah nge 1-0, yehlulwe emlenzeni wokuqala itshaywa yiChicken Inn nge 2-1. Nxa iChiefs ingenelisa ukuphinda indlela eyadlala ngayo leFC Platinum, amaGamecocks kuzamele asebenze gadalala.

iBulawayo Chiefs

Nxa kuqathaniswa amaqembu womabili, kuyavela ukuthi ayaqhula njalo izazi zomdlalo zikholwa ukuba abaqeqetshi kumele baqinise abadlali abasesiswini senkundla.

Umqeqetshi weChiefs uNilton Terreso uzabeka ithemba  kuLucky Ndlela osephenduke waba yinsika eqenjini kumidlalo edluleyo. UNdlela engenelisa ukuchaya ibhola loKelvin Madzongwe balitshintshane loArthur Musiyiwa anduba balise kubagadli abafana lo-Obriel Chirinda.

Ubungcitshi bukaTerreso buzabonakala mhla womdlalo, kudingwa icebo lokuchumisa u-Antipas.

uNilton Terreso

Kodwa umsekeli we-Chicken Inn uMcCloud “Moyez” Moyo utshele intatheli kaMthunywa ukuthi abethuki lutho.

Uthe loba kukhanya angathi sebebalekelwa yinkezo, iBulawayo Chiefs izayicela isivuthiwe.

Kweminye imidlalo, iHighlanders iqaphisa imisila iqonde eGweru lapho ezadlala khona leWhawha. Abalandeli bayo sebevele babika ukuba bazayilandela behlose ukuyasekela umqeqetshi omutsha uBaltermar Brito oselethe injabulo ngokunqoba.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds