uMthunywa
Ethel Ncube
ABAFUYI bemvundla sebevule inhlanganiso ebamelayo ngenhloso yokukhuthaza abanye abafuyi ukuthi bangene kubhizimusi le, yokufuya imvundla.
Inhlanganiso yeZimbabwe Commercial Rabbit Breeders Association, ebibukise kumbukiso weZimbabwe International Trade Fair, iveze ukuthi kuminyaka emibili iqale ukusebenza kuleli, ibisiza abafuye imvundla ngolwazi lokufuya izifuyo lezi.
UMthunywa ukhulumisane lomkhokheli walinhlanganiso uNkosikazi Ntokozo Sibanda oveze ukuba inhlanganiso yakhe izimisele ukusebenzisana labalimi.
“Inhlanganiso yethu isikhona kuzabelo zonke elizweni. Sabambana lamanye amazwe e-Afrika abalisa iNigeria, Botswana, Kenya, Mozambique leSouth Africa sabumba inhlanganiso le ukuze sincedise abafuyi bemvundla ngokubahlomisa ngolwazi oluphathelane ngayo,” kutsho uNkkz Sibanda.
Uqhubekele phambili ekhuthaza abafuyi bemvundla ukuthi babe ngamalunga enhlanganiso le.
“Sikhuthaza abalimi ukuba babe ngamalunga enhlanganiso le ukuze basizakale mayelana ngokuthengisa imvundla yabo lokuyinakekela. Nxa ufuya ungaphansi kwenhlanganiso yethu uyazitholela lonke ulwazi ngezifuyo zakho lula nje,” kuphetha uNkkz Sibanda.
