uMthunywa
Nkosilathi Sibanda
BAKHULUMA becatshile abaphathi bamaqembu anxuswe kunkezo kaMarvelous Nakamba, bekhala ngokuthi baphiwe isikhathi esifitshane ukulungiselela imidlalo yenkezo le ezaqhutshelwa koBulawayo kumaviki azayo.
Abadlali abasacathula kubhola likanobhutshuzwayo bazathola ithuba lokudlala ngemva kwesikhathi eside bengagijimi, okuyikhona okudida amakhanda abaqeqetshi lenkokheli zamathimu anxuswe kuMarvelous Nakamba Foundation.
Amaqembu ayisitshiya galombili, kusukela mhlaka 19 kusiya ku-20 Nhlangula, akhangelelwe ukuthi ancintise kulinkezo yakuqala eqoqwe ngumdlali weqembu le-Aston Villa uMarvelous Nakamba.
Amaqembu anxusiweyo abalisa iHighlanders, Dynamos, Njube Spurs, Hwange Dynamo, Albun Academy, Bulawayo City, Ajax Hot Spurs leChicken Inn.
Ngokuhlelwa komncintiswano lo, kubikwa kuzavunyelwa abadlali abaleminyaka yokuzalwa elitshumi lasikhombisa kusiya phansi.
NgoMvulo inhlanganiso yeSport and Recreation Commission ivumile ukuthi inkezo yeMarvelous Nakamba idlalwe kodwa amaqembu awasuthiseki.
Kungxoxo lephephandaba likazulu, kuleziphathamandla zenguqu ezithe inkezo kaNakamba bekumele ifuqelwe phambili.
Ngesikhathi amaqembu la ekhalaza ngokuthi awalamali, akhona athwele amagabha avuzayo ngokwehluleka ukubumba amaqembu abadlali abaleminyaka engu-17 kusiya phansi.
“Akulaqembu elizimisele ukudlala. Iqiniso yikuthi bonke abantwana abazancintisa bayabe bengawulungiselelanga umdlalo,” kutsho esinye seziphathamandla lezi.
Umbiko othunyelwe yinhlanganiso yabaqoqi beMarvelous Nakamba Foundation uthi isizatho sokwenza lumkhosi wenguqu yikuzama ukukhulisa ithalenta elisakhulayo ngokunikeza abadlali ithuba lokuzitshengisela.
Kubikwa uNakamba uzasungula lekolitshi elizalolonga abadlali abasakhulayo izwe lonke mhla welanga lomncintiswano.
“Ngenxa yokuthi uMarvelous Nakamba waphiwa ithuba lokudlala eqenjini elikhulu eleminyaka engu-17, kubalulekile ukuthi inkezo yeMarvelous Nakamba Foundation layo inikeze abadlali abancinyane ithuba elifanyo.”
