uMthunywa
Ethel Ncube
KULOMFANA weZimnyama ePlumtree ofunda ugwalo lwesibili kumfundo yaphezulu osezakhele udumo ngokuqala ukuhlabela ingoma zikamaskandi.
UAphiwe Moyo uqale ukuhlabela ingoma zakhe zikamaskandi ekugwalo lwakuqala kumfundo yaphezulu ngomnyaka ka2021 ehlabela lomunye umakhelwane wakhe uJesephat Ndebele owazakala kwezomculo ngelokuthi nguSobancane.
UMthunywa uxhumane lomaneja waleliqembu uMnumzana Handsome Sibanda oveze ukuba ababili laba balethalenta.
“Umfana lo, u-Aphiwe utshengisa ithalenta elihle kakhulu, ngiqale ukubancedisa ngomnyaka ophelileyo lapho engathola behlabela khona ingoma zikamaskandi. Ngikhuluma nje sebeke bahamba eMzansi Afrika lapho ababenxuswe khona kwelinye ikolitshi lakhonale ukuba bazohlabela bafika benza kuhle kakhulu.
Abaculi bakamaskandi uAphiwe Moyo loSobancane
“Ngempelaviki esanda kudlula bahambe bayahlabela koBulawayo emcimbini kaJoshua Mqabuko Nkomo Foundation,” kubika uMnu Sibanda.
Uqhubekele phambili echaza ukuba iqembu leli lokhe laqala balengoma abazikhuphayo.
“U-Aphiwe loSobancane sebacindezela ingoma ezimbili lokhe baqala ukuhlabela, okwakhathesi zikhona ingoma ezimnandi zikamaskandi abasaziphekayo. Sikhangelele ukuba sizikhuphe maduzane abalandeli bazithokozele ngomculo wabo.
“Ngikhangelele ukuba umculo wabo ukhule njalo benelise ukuba bahlabele bendawonye labanye abahlabeleli. Sicela abantu babaxhase ngokubabiza emicimbini yabo.
“Izingoma esilazo zimnandi njalo nxa ulalele ziyakuthinta zibuye zikwelaphe umphefumulo wakho,” kuphetha uMnu Sibanda.
