uMthunywa
YiNtatheli kaMthunywa
KUBALULEKILE ukuthi amankampani asekele imidlalo ekhangelelwa phansi njengalokho okwenziwe yiNgwebu Breweries kumdlalo weTug of War.
Lokhu kukhulunywe linengi labathandi bezemidlalo abakade bebukele imidlalo eqhutshwe ngelanga lokucina egcekeni leZimbabwe International Trade Fair (ZITF). Kumidlalo ebikhona, owe-tug of war yiwo ohlabe umxhwele abantu abanengi.
Umdlalo lo obusekelwa yiNgwebu Breweries, ubulamaqembu edlula itshumi avela kuzo zonke izabelo njalo abelwela isicoco esikhulu.
Kuhlandla labobaba, kunqobe iqembu le-Exide Batteries elikhulele amadoda eBulawayo Metropolitan. Iqembu leMutare Board and Timbers lithole umvuzo wesithathu. Kuqula labomama kungqobe iGlow Petroleum, kwalandela iqembu le-City of Mutare, iBulawayo Metropolitan ibe ngeyesithathu.
Umvuzo wokuqala ubulemali engange US$200, owesibili US$150, owesithathu US$100.
Okwenze umdlalo lo wajabulelwa linengi yikuthi abalandeli bawo bawucina ngomnyaka ka-2019, umiswe ngenxa yomkhuhlane weCovid-19.
Isikhulu kwezokuthengiselana kunkampani yeNgwebu Breweries uRay Makwaiba ubikele iphephandaba likazulu ukuba bazimisele ukuba basekele imidlalo efana le-tug of war.
“Ukusekela umdlalo lo kuyinsika kunhlelo zethu zokuphakamisa umphakathi osekela inkampani yethu.
“Okumqoka lonyaka yikuphumelela kwamaqembu adabuka kumhlubulo ongezansi yelizwe okuyiwo asesabalalise udumo lwalumdlalo,” kutsho uMakwaiba.
Inhlanganiso yeZimbabwe Tug-of-War Federation ibike ukuthi isizaqinisekisa ukuthuthukisa amaqembu kundawo zonke elizweni ukuze umdlalo ukhule.
Ray Makwaiba
“Ukuphenduka komdlalo we tug-of-war esekelwa yinkampani yeNgwebu Breweries kuyasikhuthaza ukuthi siqhubeke siwuphethe umdlalo,” kutsho uSmart Nyoni ongomunye wenkokheli zalinhlanganiso.
“Kuyasijabulisa ukuthi umncintiswano wethu usukhona njalo ulosekelo ngemva kokuvalwa isikhathi eside ngenxa yomkhuhlane weCovid-19.
“Abantu bazibonele ukuthi umdlalo lo ngowabo, njalo lenkampani yeNgwebu Breweries ikubonile ukuba umdlalo ulosekelo ebantwini. Sikhuthaza bonke abalothando lwezemidlalo ukuthi basekele umdlalo wethu.”
Abalandeli bomdlalo lo abasemalokitshini akoBulawayo abakhulume loMthunywa baveze ukuthi bazagcwalisa inkundla zonke lapho okulomdlalo lo.
KoBulawayo umdlalo we-tug-of-war ubudume ikakhulu enkundleni zeSiqongweni eLobengula West, eTshabalala, eSizinda laseMinyela.
Kusenjalo inkampani yeNgwebu Breweries isikhuthaze amaqembu ukuthi akhuthalele ukuphakamisa abadlali abasakhulayo.
