uMthunywa
Wayne Ncube
BAKWENZILE futhi abazi ukuthatha imali kumincintiswano yokugijima ngokunqoba kumjaho weRail-Trail Charity Half Marathon.
Amabizo asejwayelekile kumdlalo lo aphume elandelana kubizwa abanqobi, okutshengise ukuthi abagijimayo abahlala kumhlubulo ongezansi yelizwe abazimiselanga ukuncintisa.
Phose iminyaka efika emihlanu, kuyo yonke imincintiswano yokugijima sekunqoba labo abaphuma kwamanye amadolobho. AbakoBulawayo bayaphekelezela. Lasemijahweni eqhutshwa kulelidolobho enjengoweRail Trail Charity Half Marathon, kuqansile kubagijimi.
Izicoco zegolide zithethwe ngu-Elijah Mabhunu kwabesilisa, uSamson Muroyiwa kwabesilisa abagogekileyo, uThandiwe Ndlovu kwabesifazane abaphila lobugoga kuzokuthi uMirriam Sibanda kwabesifazane.
Bonke laba sebedumile ngokunqoba begijima kumjaho esabalale ilizwe lonke.
Kubikwa inengi eliphatheke kulumjaho lilele lilinde ubusuku ngoMgqibelo.
Umjaho lo uqoqwa yinkampani kaLoliwe minyaka yonke ngemizamo yokuthuthukisa ezemidlalo kuzulu lokusebenzisa imali ephuma kulumjaho ukuncedisa kumpilo zabagogekileyo.
Umjaho lo ugubha ilanga isitimela sakuqala esafika koBulawayo mhlaka 4 Lwezi 1897.
Obona ngezokukhitshwa kwembiko kunkampani kaLoliwe uNyasha Maravanyika uthe balokuthaba ukuthi umjaho wabo uqhube kuhle ikakhulu lokuthi abantu bavuka ngovivi bebhekise amabombo emagumeni eRaylton lapho obekuhlelwe umjaho.
“Siqhube kuhle kodwa okusijabulisayo yikwanda kwabantu abagijimayo kulumjaho.
“Lonyaka impumela yabagijimi abavelileyo bebengu-280. Ngomnyaka odluleyo kugijime abantu abangu-80.”
Omunye wababukeli bomjaho lo okhulume lentatheli ngeSonto ekuseni uMartin Banda uthe ubone ithalenta kuziqubu zabagijimi, ikakhulu kubomama.
“Kulemuli engiqede amandla ngoba bonke nje balesiphiwo sokugijima. Umanqoba wanyakenye uRudo lodadewabo uMirriam kanye lomfowabo uGolden Mhonderwa, ngamalunga emuli inye labo,” kutsho uBanda.
Lonyaka kugijime labantwana bezikolo ezibalisa iMatjinge esisePlumtree, lesikolo seNyanga.
UMaravanyika uncome amankampani labantu abancedise ukuthi umjaho uphumelele.
“Okwakhathesi umjaho usuyedlule sisalinde ukugcwalisisa isithembiso sethu sokunceda abagogekileyo. Okwakhathesi angeke senelise ukupha ibizo lenhlanganiso ezancediswa.”
“Sibonga singaqedi kunhlanganiso zonke ezithe ukuxhasa inhlanganiso yeNRZ ngoba umjaho lo ubemkhulu njalo abagijimi bathole izinto ezehlukeneyo ezivela kulezinhlanganiso.”
