uMthunywa
UKHUMBULANI Nkomo umongameli weTalen Vision ubike ukuba abadlali beqembu lakhe bengangena enkundleni loba nini.
UNkomo uthe ngesikhathi isizwe sihlezi phansi ngegcikwane leCovid 19, iqembu beligcine kakuhle abadlali balo, likhangelele ukuthi mhla kuvulwa inkundla zika-Division One, lingabuyeli emuva. UNkomo uthe abadlali labaqeqetshi bancediswe kakhulu ukuthi baqhubeke ngempilo zabo loba imidlalo isavaliwe.
“Iqembu leTalen Vision lilandele zonke izinqumo zokuthi abadlali bahlale ezindlini kwenqabelwe umkhuhlane lo osumemetheke umhlaba wonke,” nguNkomo lo.
“Abadlali labaqeqetshi siyabancedisa ukwenzela ukuthi impilo zabo ziqhubekele phambili. Lapho okubikwa ukuthi siqale inguqu, iqembu leTalen Vision lizabe limelele ukuthi liqale imidlalo.”
