YiNtatheli kaMthunywa
KULIMPELAVIKI imidlalo yePremier League imisiwe ngoba inhlanganiso yePSL ifuna ukunikeza abadlali ithuba lokuthi bayevota.
Imidlalo elandelayo izakuba khona mhlaka 4 kuNcwabakazi. Kumbiko ethunyelwa iphephandaba likazulu, iPSL ibika ukuba yedlulisele phambili imidlalo ngoba ifuna ukunikeza abalandeli bomdlalo isikhathi sokulungiselela ukhetho.
Isizwe singena kukhetho olukhulu ngoMvulo ozayo lapho okuzavotelwa inkokheli zekhansili, iphalamende lomongameli wesizwe.
Isikhulumi sePSL uKudzai Bare wazise ukuba iligi izathatha ikhefu okweviki elilodwa.
“Akusoze kubelemidlalo ngempelaviki yomhlaka 28 kusiya ku29 Ntulikazi. Iligi izaqhubeka ngempelaviki yamhlaka 4 kuNcwabakazi.
Kumbiko lo, iPSL yaqonqosela ukuba ababukeli abangena enkundleni kulesi isikhathi sokhetho akumelanga bagqoke impahla zamabandla ezombusazwe.
“Njengoba isizwe siphakathi kokhetho olukhulu, sicela kungabi lomuntu ozangena enkundleni egqoke impahla yezombangazwe kumbe elotshwe okuhambelanayo,” kutsho uBare.
UMthunywa uxoxisane labanye abadlali abathe bayakujabulela ukuphiwa ikhefu lokuthi basebenzise ilungelo labo lokuvota.
“Kuhle sibili ukuthi sime kancane lathi sincedise uzulu ekukhetheni inkokheli ezizasifikisa eKhenani,” kutsho umdlali weHighlanders ofihle ibizo.
Kusenjalo, iqembu lakoBulawayo iHighlanders libika ngokugcweleyo ukuba selithenge uTafadzwa Sibanda, umdlali obetshibilikela iqembu leTelOne kuligi yeZifa esenkabazwe.
Lokhu kuvezwe ngumgcinisihlalo weqembu uKenneth Mhlophe ngeSonto.