uMthunywa
Vusumuzi Ndlovu
Idlalade: Bayashiselwa
Umculi: MsizKay
SINGENA kuMabasa ngemisebenzi emitsha yabaculi bethu kulinkundla eletha ezintsha lezimnandi kwezomculo wakithi maviki wonke kuphephandaba likaZulu.
Eseqede iminyaka emibili ehlezi ngemva kokusungula idlalade lakuqala, uSizalobuhle ‘‘MsizKay’’ Nkomo usephendukile lolunye njalo uluju lwendlebe kudlalade lakhe elithi nguBayashiselwa. Lelidlalade liphuma kusasa lokhu okusayo (ngoLwesihlanu). Kudlalade leli usebenzisana leSabela Music ukusakaza kanye lokuthengisa idlalade lakhe.
Kudlalade leli elilengoma ezilitshumi lasithupha ijaha lakoNkomo litshengisa ukukhula kwezomculo. Idlalade liphekwe kustudiyo seWhooHaa Studios kukanti ezinye ingoma zisetshenzwe endaweni ezibalisela iHouse of Rising Sound Kontrol Tribe Studios, iLDuce Studios, leNambini Studios. Ukuhlanganisa lokuqoqa kwenziwe nguMsizKay, uCal_Vin loThamie Khumalo ekatalini. Usebenzisane lengqwele lengqungqulu zomculo ezifana loSandra Ndebele, Asaph, Tariq Bravo, uExMile, Char, Cal_Vin kweziyisthupha. Ezinye ezilitshumi utshova indima yakhe yomculo yedwa ngobuciko obuphezulu ebonisa ubungcitshi bakhe ekubhaleni.
Okumunyethwe kudlalade kugoqela izehlakalo zempilo lemizwa yakhe ngezehlakalo ezehlukeneyo emhlabeni aphila kuwo. Ulimi uhlanganisa isiNtu le siLungu kumculo wakhe we“WhooHaa Music”, okungumculo ohlanganisa isiNtu le hip-hop. Kusihloko sedlalade uBayashiselwa lapha ukhuluma ngokungaphatheki kwabantu nxa umuntu ezama ukuphumelela ngomsebenzi wakhe. Ukhuluma ngembali yethu abansundu kuMzilikazi loMade in Africa, lezifiso zakhe esakhula kuLondon. Simbona njalo ebonisa ezinye ingxoxo kuNgifuz’ Ubaba, Ok’bonayo Yikho, Remember Me, Uyahamb’ Ekseni loPicture 117.
Isihloko esikhulu kulelidlalade kukhanya ngesothando. Abanengi simazi ngoNgiyakhumbula ingoma yakhe la asebenzisa uMoya Wami, ebonisa ubukhulu beqhawe lomculo uLovemore Majaivana. Ngokufanayo kulelidlalade uchaza kabanzi ngezehlakalo ezehlukeneyo ngezenhliziyo, njengaku Ngiyaz’Thandela, Engikuzwayo, Take You Home, iCherry Yam loAsphinde Futhi, la akhuluma ngokuqala katsha lentombi yakhe yakudala, kepha basathandana.
Idlalade lakhe lakuqala uBazovuma lamvulela amasango, wasebenza labahlabaleli abanengi. UMsizKay wakhethwa kuzicoco zeRoilBAA ka2018. Loba enganqobanga, wenelisa ukusabalalisa umculo wakhe wagcwala imisakazo jikelele, ngengoma ezifana lo Kade Lithetha, Inkomo Zamalobolo loNgubani Ozakwenza, lapho akhuluma ngokulandela iphupho lakhe.
