uMthunywa
KUNGENZEKA loba yini ukuthi iKaizer Chiefs imthole njalo uWillard Katsande ngoba ukusuka kwakhe kuleliqembu sekutshiye inkalakatha yesikhala.
NgoLwesibili, umbiko ophume kuqembu leli uveza ukuthi iChiefs ithole umdlali olezinga likaKatsande.
Umqeqetshi weChiefs uStuart Baxter ukuvezile lokhu kulandela ukuphoxwa yiRoyal AM nge-4-1 emdlalweni weDStv Premiership ngempelaviki.
Okwenze uBaxter wacabanga uKatsande, yikuvuzisa okwenziwe yimvimbi zabadlali bakhe.
Ngesikhathi kusekhona uKatsande odlale amasizini alitshumi kuChiefs anduba aye kuSekhukhune United, besekusithi nxa iqembu lihlasela ngamawala, ahlale ekhona ukuvimba konke okungaba yingozi egedini.
UBaxter uvumile ukuthi abalaye umdlali wohlobo lukaKatsande kodwa lakubadlali bakhe basemuva akekho ongawenza lumsebenzi.
“Engingafuni ukukwenza ukuqinisa kakhulu kubadlali abavimba izitha, okuyinto ezakwenza sicine singasakwazi lokudlala ngendlela esifuna ngayo,” kutsho uBaxter.
Uqhubeke wathi: “Asilaye umdlali ohlala agade igedi njengoWillard.
“Lakubadlali abasemuva kufanele ngabe ukhona osondelayo esiswini.
“Inkinga enkulu yikuthi senza amaphutha ngesikhathi esingafaneleyo emidlalweni okuyikhona okucina sekuveza lalapho esixega khona,” kubalisa lumqeqetshi.
Ngemuva kwemidlalo yangempelasonto yeligi, iChiefs yehlele kunombolo yesi-12 ku-logu ngemiklomelo emine.
