uMthunywa
KULAMAQEMBU akuleli laphetsheya aseqoqoda engaqedi emnyango asemahofisini entshantshu zenkezo yeChibuku Super iHighlanders.
Kubikwa amaqembu afuna ukuthenga ithalenta labadlali bethimu yezwe lonke kulandela ukuzwa lokubukela indlela adlale ngayo kunyanga ezintathu ezedluleyo ingaphansi komqeqetshi uHendriek Pieter de Jongh. Umdlali wakuqala ukubizwa liqembu laseSouth Africa iBidvest Wits, sekubengu McClive “Skippy” Phiri, umdlali ogijima kwesokudla.
Umqeqetshi laye ungomunye ovulelwe ilihlo liqembu lezimbamgodi iFC Platinum, loba nje isakulandula lokhu. Ngokutsho kwabafakazi bodaba lolu olusegudwini, kuthiwa abacuphi bamathimu amanengi aseGoli, eBotswana laseTanzania athumele abacuphi kumidlalo yeBosso eyedlula eyisithupha lokhe kwafika umqeqetshi omutsha.
Loba kungabe kuzindaba ezinhle zokuthi abadlali bengathola amadlelo aluhlaza, inkokheli zeBosso zisevalweni ngenxa yokuba incwadi zokudlala kwabadlali babo ziphela kulinyanga. Lokho kutsho ukuba ukwehluleka ukuvuselela lezo ncwadi kungadala ukuthi iqembu lilahlekelwe yimali.
Sekuyinjwayelo kuHighlanders ukuthi abadlali bahluthunwa ngamanye amaqembu mahala.
Ngaphandle kukaPhiri, abanye abadlali okumele iBosso ibasayine ngokuphangisa nguNqobizitha Masuku loDenzel Khumalo.
Iphephandaba likazulu liyakuveza njalo ukuba uPhiri loKhumalo basehlelweni lweqembu leChicken Inn. Umqeqetshi wama-Gamecocks uJoey Antipas akayitshayi efihla umphini eyokuthi uzabothola abadlali bobabili ngesizini ka-2020.
Isikhulumi seHighlanders uRonald Moyo uthe udaba lokuphela kwezivumelwano zabadlali leqembu lusezandleni zabo njalo akumelanga abalandeli bezikhathaze ngoba inkokheli ziphezulu kokulungisisa lokhu.
UMoyo uthe loba bengakabi kwazi mhlophe ukuthi uPhiri ufunwa yiBidvest Wits, kibo njengeBosso kuyabajabulisa ukuzwa ukuthi kulabacuphi bemazweni abahawukela abadlali.
“Kutsho ukuthi sidlala kuhle nxa amaqembu asemazweni efuna abadlali bethu. Ukufika kwethu ku-final yenkezo yeChibuku kwatshengisa ukuba siliqembu eliqine saka.”
Kusenjalo, abasekeli beTshilamoya bathole ithuba lokujabula lokuthatha imfanekiso labadlali ngemva kokuthwala inkezo yeChibuku. Inkampani esekela iHighlanders ngemali eyeNetOne yenze umkhosi enzikini yedolobho lakoBulawayo lapho okugcwale abalandeli bethimu.
Umqeqetshi weqembu utshengisele ukuba ngumuntu wabantu nanko akula ophume kulumkhosi engazange athathe imifanekiso laye.
Ebuzwa ngekusasa lakhe, uDe Jongh uthe ubelesikhathi esihle ekuleliqembu okokuthi kuzakuba nzima ukuthi alutshiye.
“Angikaze ngibone usekelo olunje. Iqembu leli lingimangalisile, abalandeli balo baphezulu. Angazi ukuthi ngithini, kunzima, kubemnandi sanqoba.”
