Nkosilathi Sibanda
BEKUBUZWANA amavuko kumjaho weHighlanders Fun Run ngeSonto edluleyo lapho okubelabantu abanengi abatshengisele usekelo kuleliqembu, ebelisungula uhlelo lwalo lomdlalo wokugijima koBulawayo.
Kucacile ukuthi ibizo leHighlanders kalikho kumdlalo wenguqu kuphela ngoba usekelo olubekhona kulumjaho lumangalise labaqoqi bomncintiswano, nanko lamankampani lezinye ingatsha ezizimele zodwa ezisebenzela koBulawayo bezikhona.
Ekhuluma loMthunywa ngoLwesibili mayelana ngokusungulwa komjaho okuqhutshwe ngeSonto, umgcinisihlalo weHighlanders Athletics Club uLawrence Phiri ubonge bonke abasekela uhlelo lwabo.
“Uhlelo lwethu luqhube kakuhle.
Sibonga bonke abasekeleyo ngendlela ezitshiyeneyo. Abantu bathole usizo kwezempilakahle okuyikho ebesikukhangelele,” kutsho uPhiri. UPhiri wengeze ngokuchaza ukuba iHighlanders kayisilo iqembu lenguqu kuphela kodwa lisiko.
Uthe intshukuntshu yokusungula ezokugijima kuBosso yavela kumsebenzi owenziwa nguSidney Zimunya. UZimunya lo ngumdlali weBosso owathi etshiya umdlalo wakhetha ukuphatheka kwezokugijima.
“Salandela omunye wethu uSidney Zimunya owaphatheka kwezokugijima ngesikhathi etshiya umdlalo wenguqu. Sikholelwa ukuba umdlalo lo uzanceda kulabo abafuna ukuqinisa imizimba yabo lokutshengisela ithalenta.
Kusenjalo inhlanganiso yeBulawayo Athletics Board (Bab) isitshayele iHighlanders ihlombe ngokusungula umdlalo wokugijima. Umgcinisihlalo wenhlanganiso yeBab uWatson Madanyika uthe okwenziwe yiHighlanders kuyancomeka ngoba kwengeza inhlelo zabo zokuthuthukisa umdlalo wokugijima esabelweni sakoBulawayo.
“Ngazo zonke izikhathi sihlala sikhuthaza ukuthi abantu basukumele phezulu kumdlalo wokugijima. Sithi amahlophe kuHighlanders Athletics Club ngokuphumelela kwabo ekuqhubeni umjaho esibelawo.
Akusimncintiswano kuphela kodwa yikubambisana ekukhuthazeni abantu bakithi ukuthi bakhuthalele ukugijima ngoba kuyinsika ekugcineni imizimba yethu iqinile,” nguMadanyika lo ekhuluma leZimpapers Sports Hub ngoLwesibili kuliviki.
