uMthunywa
Thokozile Mbedzi
KUBE yisiphithiphithi endaweni Geelong 20 Mine eCollen Bawn bucwadlana leGwanda ngoMvulo kuyonale iviki ngesikhathi kubanjwa izigebenga ezintathu ezigqekeze zatshotsha imali engange R13 000 kanye labomakhalekhukhwini abathathu.
Abetheswacala uKaison Notice oleminyaka engu-24, Shonai Dube oleminyaka engu-20 loTinashe Mudenda oleminyaka engu-22 bonke besuka eBinga bahlasela uSimbarashe Mudzingwa oleminyaka engu-30 lo Emmanuel Chirase ngamahloka babathathela imali engange R13 200 labomakhalekhukhwini abathathu batshiya bebabophele ngamawaya babaleka.
Ekhuluma lentatheli kaMthunywa uMnumzana James Nyoni uveze ukuthi benelisa ukuthungatha umkhondo wababili laba babathola belokhu belezikhali abazisebenzisa ukuhlasela uMudzingwa loChirase.
“Ngidanile ngilapha ukuba abafana abasuka khatshana khonale eBinga babuya batshontshele abantu imali labomakhalekhukhwini kutshoni.
“Izigebenga lezi kukhanya zafica ababili laba sebezilalele ematendeni abo bafika babalaya ukuthi nxa befuna ukuphila balandele lokho abakutshoyo. Babatshela ukuthi bakhuphe imali yonke abalayo okwenza omunye akhuphe iR1 200 labomakhalekhukhwini ababili omunye iR12 000 lomakhalekhukwini batshiya bebabophele ngamawaya,” kutsho uMnu Nyoni.
Kubikwa ababili laba basala bezama ukuzikhulula bayadinga uncedo.
Isikhulumi samapholisa esabelweni seMatabeleland uChief lnspector Philisani Ndebele ebuzwa ngodaba lolu uvumile ukuthi lwenzakala.
