Brandon Moyo
IQEMBU lakuleli elekhilikithi, amaChevrons liqhubeke ngokunqotshwa nanko lehlulwe nge-63 runs yizethekeli, i-Ireland kumdlalo we-Test, eQueens Sports Club.
Besingekho isizatho sokwehlulwa kumaChevrons nanko i-Ireland ibilenyanga ezine ingadlali ikhilikithi ikukhefu.
I-Zimbabwe itshengise umdlalo ongathokozisiyo ikakhulu ngesikhathi ithwele induku. Ngemva kokuba i-Ireland inqobe ku-toss, ikhethe ukutshaya ibhola kuhlandla lokuvula umdlalo. Likhitshwe lile-260 runs ngama-over ayi-56.4. Lapho kusebenze uBlessing Muzarabani okhiphe abadlali abayisikhombisa.
Ngehlandla lesibili, amaChevrons akhokhele ngama-runs ayisikhombisa kodwa aqede ele-267 runs, kukhitshwe bonke abadlali. Kuphakame uNick Welch obele-90 runs, uMuzarabani ele-47.
I-Ireland ibele 298 runs, kukhitshwe bonke abadlali, inikeza iZimbabwe ingqobe yokufikisa i-292 ukuze inqoba kodwa yehluleka nanko iqede ile-228.
Ekhuluma ngemva kokuphela komdlalo, umqeqetshi weZimbabwe uJustin Samsons uthe ukhuthazwa yikuthi iqembu lakhe liqalisa umdlalo kakuhle kodwa licine lisehlulwa.
“Sekungumkhuba kulezi insuku. Sizithola sisesikhundleni esiqinileyo. Sibonakala sidlala kakuhle kodwa sisuka silahleke khonapho.”
Uqhubeke wathi: “Sithe sibabamba sikhipha abayisithupha babo kumabhola angu-80, besikwazi ukuthi kumele sidlale ngamandla. Kodwa ke, siphambanise kokubadelela, sibekela besikhipha kalula.
“Bekungumdlalo wethu njalo bekumele sizithobe, silungise amaphutha. Inkundla ibilungiswe kakuhle njalo ivumela ukuthi sitshaye ibhola.”
AmaChevrons angene kulanga lokucina lomdlalo edinga i-109 runs. UMadhevere ngomunye wabadlalo abenze kuhle ngesikhathi zibheda eqenjini. Ngelanga lesihlanu, iZimbabwe ingene ile-183/7 uMadhevere loNyamhuri betshaya ibhola.
Iqembu le-Ireland selinqobe ama-Test amathathu elandelana. Ngemva komdlalo we-Test lo, iZimbabwe le-Ireland zizathi ukulungiselela imidlalo ye-One Day International (ODI) eqala ngoLwesihlanu eHarare Sports Club.
