uMthunywa
Nkosilathi Sibanda
IHLANDLA lakuqala lomkhankaso weChibuku Super selidlulile, osekuvuse amehlo kubalandeli bomdlalo webhola kuligi ephakemeyo belinde ukuqhubeka kwentshantshu kuhlandla elilandelayo.
Inkezo le, eyendlalela ukuqala kweligi, ize ngesikhathi amaqembu edonse umnyaka ehlezi ngoba inguqu ingadlalwa.
Kubonakele ukuthi ukuhlala kwabadlali kwaba lomthelelo kubungcitshi babo ngoba inengi belingasakwazi lokukhaba ibhola, khona lokuhlohla.
Kuhlandla elilandelayo, kuzaphuma amaqembu amabili kuqoqo linye ngalinye azakuyadibana kuhlandla lama-quarter final.
Kuyo yonke imidlalo le, kuvele ukuba abaqeqetshi bebekhalaza ngokuxega kwamaqembu abo, nanko phela lokhe besafuna isikhathi sokuthi babumbe amaqembu aqinileyo.
Iphephandaba likazulu lihlele imibono yabaqeqetshi labadlali abathile, eveze ukuthi ukuqala komdlalo wenguqu kunkezo yeChibuku bekubalulekile ngoba ithalenta beselisifa kubadlali.
1) Joey Antipas – Chicken Inn v Bulawayo Chiefs
“Kumele sidonse amasokisi. Siqhuba mbijana, mbijana kodwa sizafika. Kuqakathekile ukuthi siqhubekele kuhlandla elilandelayo,” kutsho umqeqetshi weChicken Inn lo ngesikhathi iqembu lakhe linqobe iBulawayo Chiefs nge 2-0 enkundleni yeBarbourfields.
2) Ariel Sibanda – Highlanders v Bulawayo City
“Umdlalo lo sizitshela sathi kumele siwunqobe njengabadlali, singaqeda lapho sibuyele kudaba lwethu lweholo. Kuhle ukuthi sibekusimo esizakwenza kubelula ukugcina inkezo,” ngukaputeni weBosso lo. IHighlanders okwamanje isebunzimeni ngoba abadlali bayo bathe loba bedlale kuhle, benelisa ukuqhubekela phambili, abakanikezwa imali.
3) Thulani Sibanda – Bulawayo Chiefs
uThulani Sibanda
“Asidlalanga kuhle, umdlalo esiwujwayeleyo. Abadlali abazange banikezane ibhola kakuhle. Besingela mkantsho ngitsho,” kutsho umqeqetshi weBulawayo Chiefs lo osekhulume kanengi ukuthi abafana bakhe bayamlahlisa ngesikhathi somdlalo. USibanda, owaziwa njengomqeqetshi olesiphiwo sokubona okungabonwa ngabanye abaqeqetshi, wayehlala ehlupha amaqembu abalisa iHighlanders, iChicken Inn leDynamos.
