uMthunywa
UMDLALI wenguqu wakuleli, odlala ku-Golden Arrows uKnox Mutizwa usetshayelwe ihlombe ngokuba ngumdlali osehlohle amabhola amanengi kumbali yaleliqembu.
Usegaxe entanjeni amabhola angu-51, kumidlalo eyedlula i-120. Wedlule amabhola angu-39 ahlohlwa nguMabhuti Khenyeza.
Ukuhlohla kusegazini kulumdlali lo owake wadlalela iHighlanders.
UMutizwa ngo-2015 waba ngumdlali owahlohla amabhola amanengi, waphiwa isicoco.
Ufike ku-Arrows wabizwa ngokuthi nguMjomani lo, bebabaza indlela ahlohla ngayo, befanisa umdlalo wakhe lengcitshi enguJomo Sono.
Abafana Bes’thende benzele uMutizwa idili elincane, baphinda bamnikeza isipho ngaphambi kokuthi badlale leqembu leRoyal Aim ngempelaviki edluleyo.
UMutizwa, oleminyaka engu 29 yokuzalwa, uhlonitshwa njengomunye wabagadli abenza kuhle kuDstv Premier League.
Umdlalo wakhe awucini ngokujabulisa ukuwubuka, kodwa utshengisa ithalenta elipheleleyo.
Umgadli lo othandwa linengi labantu ungene kuGolden Arrows ngo-2017 esuka kuBidvest Wits — Ubulembu
