uMthunywa
Ethel Ncube
ZIKHUZA imihlola izakhamizi zakoBulawayo ngemva kokuba enye imuli yakoShava evela eDangamvura, eMutare ifike izodinga uncedo lomntwana oleminyaka emithathu okubikwa ubesehlala evuvuke isitho sangasese andubana kuvele ukuba elinye ilunga lemuli yabo belimsebenzisa ukuzalisa imbuzi zakhe ukuze umhlambi ukhule.
UMthunywa uzwe udletshana lokuba imuli le ebisibhode ezibhedlela kodwa iswela uncedo ize yazowela koBulawayo kunyanga ephelileyo lapho okunakanelwa ukuba kulelunga lemuli yakoShava eliyilo ebelisebenzisa umntwana lo ngendlela engaqondanga.
Intatheli yephephandaba likazulu yenelise ukuxhumana lelinye ilunga lemuli le elabuya lomntwana koBulawayo bezodinga uncedo ukuze izwisise ngendaba le edida ingqondo.
koBulawayo
“Sekuleminyaka emibili umntwana waqalisa ukuvuvuka amaphambili ngoba kwaqala elomnyaka.
Kusukela lapho ubesehlala engogulayo sihlala sisesibhedlela.
Besesibhode saze sadinwa kanti kwenziwa ngumuntu oseduze lathi.
“Umuntu lo uyisihlobo sethu njalo kukhanya ubesebenzisa umntanethu ngomuthi ukuthi azalise imbuzi zakhe njalo umhlambi wakhe ubusukhule waya ku-68.
“Ukuthi ubekwenza njani sidinge saswela kodwa engingakutsho yikuthi imbuzi lezi zazihlala zifika ngekhaya sizixotshe ziphenduke,” kuchasisa ilunga lemuli le elingathandanga ukuqanjwa ngebizo.
“Ukhona omunye esihlala laye eMutare onguye osilayele ukuthi sizodinga uncedo khonapha koBulawayo kuMphurofethi uMutumwa.
“Ngenxa yesimo ebesiphakathi kwaso sabona kungcono ukuthi sizofika sehluleke kodwa sike sazama.
Safika sangena inkonzo njengabanye abantu.
Lamhlanje isimo sesitshintshile sibili, umntwana usesizwa ngcono kakhulu kulendlela esabuya laye eyiyo yona,” kutsho ilunga leli lemuli.
UMphurofethi uEmmanuel Mutumwa ekhuluma loMthunywa uthe abantu kunengi abakwenzayo empilweni ngemithi ngoba befuna inotho.
“Umntwana lo kukhanya ubeseleminyaka emibili ehlala ekhala ngesitho sangasese kanti kulelunga lemuli elaseliphethe umuthi wokwengeza umhlambi walo wembuzi.
“Ngesikhathi ngikhuleka umoya wangivezela ukuthi kulokuganga okwenziwa emntwaneni lo ngasengibancedisa,” kutsho uMutumwa.
