uMthunywa
Nkosilathi Sibanda
ABADLALI benguqu koBulawayo bathi abasoke bayekele ukuphatheka kumidlalo yokubheja emalokitshini ngoba yikho laphop asebethola khona imali yokugcina imuli zabo.
Imidlalo yebhola likanobhutshuzwayo yacina ukuba khona ngesizini ka-2019 kuleli ngemva kokumiswa yiCovid-19.
Lokhu sekudale ukuthi kubenzima kumaqembu ukubhadala abadlali nanko phela phose wonke amaqembu la ebencedwa yimali evela kubabukeli enkundleni.
Akhona amaqembu aseqede umnyaka wonke engazange aholise abadlali. Kumaqembu akumaligi aphansi njenge Division One, isimo sibi kakhulu.
Loba imigoqo yeCovid-19 isithi kungadlalwa ibhola, inkundla ezisemalokitshini abalisa iMakokoba, Lobengula, Mzilikazi, Matshobane, Mpopoma, Pumula, Cowdray Park leNkulumane zihlala zinyakazela ngemidlalo yokubheja.
Iphephandaba likazulu lithole ukuthi imidlalo iqhutshwa ekuseni, kusenzelwa ukuthi amapholisa angananzeli.
Abadlali abaxoxe lentatheli bacele kakhulu ukuthi bengaqanjwa kodwa phakathi kwabo bakhona abadlalela iHighlanders, Chicken Inn, Bulawayo Chiefs labanye abasuka kumaqembu asacathula.
“Sidlala nsukuzonke ekuseni ngesikhathi sehola lesithupha. Imidlalo yethu ayithathi isikhathi eside ngoba sesaba ukuthi singabanjwa ngamapholisa kumbe lina intatheli lisithwebule impikitsha,” kutsho omunye wabadlali laba.
Kubikwa imali ababheja ngayo iyatshiyana ngensuku kodwa umdlali munye ngamunye uyenelisa ukuphenduka ekhaya elemali efika US$10.
“Akufani lokuhlala. Siyenelisa ukuthengela abantwana ukudla kwekuseni lokuthi sihlanganise imali yerenti.”
Ukwenza kwabadlali laba akumthabisi umaqhuzu wePremier Soccer League uKennedy Ndebele, ngoba ekuqaleni kokumiswa kwemidlalo ngo-2020, wabika ukuba bazajeziswa abadlali.
Ugatsha lwabaqeqetshi kunhlanganiso yeZimbabwe Soccer Coaches Association (Zisca) koBulawayo lethule umbiko ligcona isenzo sabadlali.
UMorris Mukwiti Unobhala wenhlanganiso le uthe udaba lwemidlalo yokubheja iyabakhathaza.
UMukwiti uthe kulihlazo ukuthola ukuthi labadlali bamathimu aphezulu batshonela ukubheja emalokitshini.
“Kuyayangisa lokhu. Imidlalo yokubheja le isiminengi, ikakhulu ngesikhathi lesi ese-Covid 19,” kutsho uMukwiti
“Ukwelula abadlali sekusehlula thina abaqeqetshi. Abadlali bakhala ngokuthi abalamali njalo badinga ukuthi bahlale belolonga ukuze bekhiphe isizungu.”
Uthe abadlali akumelanga bazitshele ukuthi badinga imali ngoba kunengi okungabaphazamisa kumidlalo le.
“Ukubheja ngumkhuba omubi. Bazalimala abadlali laba kumbe becine sebenatha utshwala okwedlulisileyo.
Akulamthetho phela kumidlalo le njalo umuntu ulakho ukuthi alimale okwempilo yonke acine engasalidlali ibhola.
“Siyabacebisa ukuthi abazame ukuzibamba abadlali bethu. Kunzima sibili ngesimo seCovid-19 esikuso kodwa asicabangeni ngelakusasa,” kutsho umqeqetshi lo.
