uMthunywa
Ethel Ncube
KULEZAKHAMIZI zePlumtree ezimbili lentombazana eyodwa abamiswe emthethwandaba besolelwa icala lokubulala umsolwa owadlengulwayo.
Abathathu laba bamiswe emthethwandaba wePlumtree kuyonale iviki phambi kukamantshi uJoshua Nembaware besetheswa icala lokutshaya umuntu aze adlule emhlabeni.
Abathathu laba nguIshel Nkiwane, Angel Gugulethu Sidusi lomunye unkazana oleminyaka engu-15 yokuzalwa. Laba abathathu kubikwa batshaya u-Alasha Gumbo waze wedlula emhlabeni.
Umtshutshisi uVoster Makuwerere uveze ukuba umsolwa watshaywa ngemva kokudala icala lokudlwengula.
“U-Alasha Gumbo ngoNhlangula kuwonalo umnyaka wahamba kwenye indlu wafika wandlwengula umntwana wathi esebaleka abasolwa bambona bambamba bambopha. Wathathwa ngabathathu laba bamtshaya ngezandla ilanga lonke wathi eselambile bamnika isitshwala esilamanzi besithi kadle qede bamtshaye okuzwayo waze wacina ewela phansi wahle wedlula emhlabeni okwadala ukuba kubotshwe abathathu laba,” kubika uMakuwerere.
Umantshi uJoshua Nembaware uveze ukuba abathathu laba bazaphenduka njalo enkatolo ngomnyaka ozayo ngenyanga kaZibandlela besuka emakhaya abo.
