Bangena umnyaka begijima

05 Jan, 2023 - 00:01 0 Views
Bangena umnyaka begijima uTendai Tagara

uMthunywa

Nkosilathi Sibanda

UKUQALA komnyaka besekubaphuzele abakumdlalo wokugijima nanko kuzaqhutshwa imincintiswano kulimpelaviki kuzabelo zonke.
Inhlanganiso yeNational Athletics Association of Zimbabwe (Naaz), ibike ukuba ayifuni ukuchitha isikhathi lonyaka ngoba ihlose ukuthi abagijimi bakuleli bathole ithuba lokulungiselela imincintiswano yaphezulu.

Kulimpelaviki ngokuhlelwa kwekhalenda yeNaaz, kuzaqhutshwa imincintiswano kuzabelo zonke. Imincintiswano le ibileminyaka emibili imisiwe kulandela ukuqhamuka komkhuhlane weCovid-19.

Umqhudelwano omkhulu ohlanganisa intshantshu zezabalelo uhlelwe mhlaka 16 Zibandlela. Ekhuluma lentatheli kaMthunywa ngoLwesibili, umongameli weNaaz uTendai Tagara uthe bazasebenzisa umbuthano lo ukukhetha labo abazamela ilizwe kuWorld Cross Country Championships, e-Australia ngoNhlolanja.

“Sifuna ukulungiselela yonke imincintiswano yamazwe. Sikubone kulinyathelo elihle ukuthi siqale ngokuqala komnyaka ukuqhuba imincintiswano,” kutsho Tagara.
Uthe eminye imincintiswano abayikhangeleleyo ibalisa eyeNational Junior Championships kunye leSenior Inter-Provincial Tournament ngoMbimbitho.

“INaaz ifuna ukuthuthukisa umdlalo wokugijima ngendlela yaphezulu. Sifuna abagijimi bethu bangene esigabeni sama-Olympic Games ngo-2024. Siyalungiselela.
“Inhlanganiso yethu ibe lesizini enhle phakathi komnyaka ka-2022, ngemva kokumiswa yi-Covid-19. Okwakhathesi sigxile ekulungiseleleni ama-Olympics ka-2024,” kutsho uTagara.

Kubikwa kuzakuba le-World Athletics Championships edolobheni leBudapest, eHungary, ngoNcwabakazi.
Kusenjalo, iphephandaba likazulu lizwe ukuba inhlanganiso yeBulawayo Athletics Board (Bab) ibika ukuba isihlele ukufundisa ababalisi abangaphansi kwezinhlanganiso zabaphathi bezikolo ze-Primary (iNaph) leze-Secondary (iNash).

Umgcinisihlalo weBab, uWatson Madanyika uthe kumqoka ukuthi ababalisi babe lolwazi olujulileyo ngomdlalo ukuze balolonge ithalenta elisakhulayo ngendlela eqondileyo.

“Ababalisi kumele bathole izithupha zaphezulu, yikho nje siqala ukuthi sifundisane nge-athletics. Sikhangelele ukuthi kuze abantu abanengi, hatshi ababalisi kuphela,” kutsho umgcinisihlalo weBab uWatson Madanyika.

“IBab ikhuthaza ukuthi izikolo zithumele ababalisi bazo kuzifundo zomdlalo. Kuzakuba lamanye amakhosi njalo lapho esizafundisa ngemithetho yomdlalo ehlala itshintsha njalonje.”

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds