uMthunywa
Bongani Ndlovu
KUSEHLAKALO esihlasimulisa umzimba kulemuli yeMlotheni eTsholotsho eyenze imbedumehlwane ngesikhathi ingcwaba elinye ilunga lemuli nanko phela kubikwa bangcwabe benqunu baphinda bangcwaba isidumbu lenja ephilayo.
Imuli le engcwabe iphethe lemikhonto yenze imithanithani le ngeSonto mhlaka 12 Nkwenkwezi ngesikhathi ibeka uMbongeni Ndlovu owatshaywa yimota eGoli. Izakhamizi zakulindawo zilokhu zikhakhamele ngalokhu ezakubona kusenziwa yimuli yakoNdlovu.
Kuzwakale ukuthi abafowabo bakamuyi uBheki loEdmore Ndlovu bathi bebuya lesidumbu babuya lenja abafika bayibophela esihlahleni sambuzi elinde ukuhlinzwa.
Ngelanga lomngcwabo abafowabo bakamufi babonakala begqoke amakhabhudula phezulu bengagqokanga lutho bephethe imikhonto bedonsa inja abafika bayingcwaba kanye lesidumbu iphila.
Kubikwa ngaleso sikhathi babengani bayathethela ngoba bezwakala bekhwaza bethi: “Vuka uzilwele mfowethu, ungafi njengesiwula kumbe imvu efa ithule.”
Ipholisa lesigaba elalikhona emngcwabeni lo uMnumzana Lameck Ndlovu uthe lokhu betshe amathe ngabakubonayo ngoba imuli le yayingela nhloni ngitsho ngeyayikwenza.
“Ngangikhona esililweni sakoNdlovu njalo ngamangala ngibona bebambe inja beyifunza umuthi beyilaya ukuthi ivuke izophindisela kulabo abaphambanise umfowabo ngaphambi kokuba bayigqibele ndawonye lesidumbu iphila.”
“Bekhuluma besenza njalo babephethe behlaba ethuneni ngemikhonto beqhubeka bekhuluma,” kuchaza uMnu Ndlovu.
Esinye isakhamuzi esithande ukwaziwa ngokuthi nguMariya Ncube uthe baswela ukuthi bangene ngaphi bebona abafowabo bakamuyi bethutsha benqunu bethwele imikhonto behamba bedonsa inja ibhokisi liseceleni.
“UBheki loEdmore besebeleminyaka embalwa bahamba eGoli babuye sebehamba lesidumbu somfowabo.
“Abafike bakwenza lapha sonke sinje asikaze sikubone. Kwathi sokungcwatsha bahamba bayahlubula impahla bathutsha sebegqoke amakhabhudula bephethe lemikhonto ngapha bedonsa inja.
“Isidumbu sithe sesehlisiwe samangala sebephosele inja phakathi iphila. Inja le yayilokhu isadalala izama ukuphuma phakathi kwegodi bona bephethe beyifuqela phakathi ngapha beyilaya bethi phindisela kulabo abakubuleleyo, ungafi uthule,” kulandisa uNkszn Ncube.
Iphephandaba likazulu libuye lakhulumisana lonina kamuyi uNksazana Kholina Nkomo ongazange alandule ukuthi bangcwaba uMbongeni lenja ephilayo.
“Kuliqiniso ukuba sangcwaba umuyi uMbongeni lenja njalo abafowabo ababili uEdmore loBheki labanye babethwele imikhonto sisenzela ukutshaya ithuna ngoba sifuna avuke ayophindisela kubabulali bakhe.
“Ngesiko lethu akulanto emangalisayo ngakho ngoba sitshaya ithuna kukhanya njalo abantu kumele bakubone lokhu sikwenza,” kuchaza ugogo uMaNkomo.
“Imvumo yokwenza lokho sahamba sayayicela kuSobhuku uVincent Dube ngemva kokuba uBheki loEdmore behambe bayakhuluma laye bemtshela ngenhloso yethu yokuvikela imuli yethu,” kulandisa ugogo uMaNkomo.
Ikhuluma lephephandaba likazulu induna yesigaba u-Ashel Sithole eyaziwa ngokuthi nguGampu ibike ukuba isehlakalo sangempelaviki siyinsinda badala njalo imuli yakoNdlovu ibelenhlanhla ngoba wayengekho ngelanga lomngcwabo.
“Lokhe ngathwetshulwa yingwe angizake ngikuzwe kumbe ngikubone ukuthi umuntu uyangcwatshwa lenja ephilayo, ngabantu abanqunu bethwele imikhonto njengalokho okwenziwa ngabakoNdlovu. Sengike ngahlala phansi labadala besigabeni labo ngokufanayo bayaqala ukuzwa ngesiko elinjalo.”
“Ngemva kokukhuluma loyise kamuyi uMnumzana Ndaniso Ndlovu uthe abantwana yibo ababuya lenja le kanye lomcabango wokuthi benze leso siga njalo babesithi nxa mina ngisala ukuthi kwenziwe kuyabe kusitsho ukuthi lami ngilesazela ekufeni kukaMbongeni.
“Ngenxa yalokhu ngangingelawo amandla okubalisa ukuqhuba isinqumo ababesikhethile sokungcwaba umfowabo lenja ephilayo njalo benqunu.
“Senginqume ukuthi ngibize idale ngoLwesihlanu lapho esizakhuluma ngesiko leli elilihlazo njalo imuli le ngizayipha isigwebo esifaneleyo,” kuveza uChief Gampu.
Ekhuluma lephephandaba likazulu uMnu Mhabhinyane Ngwenya oyisikhulumi sezamasiko ubike ukuba lokho yibuthakathi njalo abantu abanjalo abuvunyelwa emphakathini.
“Lokho yibuthakathi obutsha sibili ngoba kungekho emasikweni ethu amaNdebele, le yinto engazake yenzakale kungakho ngizathintana lenduna uGampu ngiyitshele ukuthi abantu abanjalo abalandawo yokuhlala emaphandleni ngoba beyingozi,” kuphetha uMnu Mhabingane.
