uMthunywa
Khanyile Ndebele
UMDLALI wenguqu uKudakwashe Mahachi uthe abaphathi besibhedlela seMpilo bamalisa ukuthi ancedise umntanakhe njalo abone isimo akuso.
Lokhu kuvezwe ligqwetha lakhe uMnumzana Nkosiyabo Sibanda oveze ukuba umdlali lo, loba encitshwa ithuba lokubona lokuzwa ngesimo sendodana yakhe uDiego, usezimisele ukuthi aye emthethwandaba ukuze azigeze kunkemenkeme le.
UMahachi usemlonyeni womphakathi kulandela ukuvela kodaba lokutsha komntanakhe. Imifanekiso esigcwele ebulenjini iveza ukuba uDiego watshiswa ngamanzi enyaweni, eqolo lasekhanda. Kuloludaba olwavezwa liphephandaba le-B-Metro kumaviki amabili adluleyo, kuzwakale ukuba indodana kaMahachi yatshiswa iseGoli ngesikhathi ivakatshele uyise.
Nkosiyabo Sibanda
Kubikwa ngokutsha kwalumntwana, uMahachi wamthumela eZimbabwe ngomalayitsha.
Umntwana lo uthole usizo esibhedlela seMpilo koBulawayo, okuyilapho alokhe ekhona ekhangelwe ngodokotela lonina uMaritha Ndlovu.
UMaritha loMahachi behlukana.
Kwande usizi ebantwini abanengi kusabalala isiga lesi.
Kuphinde kwaba lembono ehlukeneyo echaza ngokutsha komntwana.
Abanye abafakazi bodaba babika ukuba umntwana watshiswa nguMahachi, kodwa umdlali lo ukulandule lokhu.
Okwamanje iqembu likaMahachi, eleSuperSport, selithe umdlali lo athathe ikhefu ayelungisa loludaba.
Igqwetha lomdlali lo libikele intatheli ukuba uMahachi uyazigeza kuyo yonke into.
Kumbiko walo, igqwetha lithe uMahachi sezamile ukwenza konke okusemandleni akhe ukuthi indodana yakhe ithole ukwelatshwa kodwa wehlulekile.
“Mayelana lendodana yakhe, uMahachi usezamile njengobaba ukuthi akubone ukuba uyanakelelwa kuhle ukuze athole usizo,” kutsho uSibanda, igqwetha likaMahachi, elivela kunkampani yeTanaka Law Chambers.
“Wathumela odokotela ababili abakhangela impilakahle yabantwana kodwa odokotela laba bavinjwa ukuthi behlole umntwana.
Uthe okwamanje, labo bengamagqwetha basalinde incwadi yabodokotela ezaveza ukuthi ngempela indodana kaMahachi yatsha.
“UMahachi wazisa ukuba usecele kuziphathimandla esibhedlela ukuthi zithumele incwadi kubodokotela bakhe ukuze abekwazi ngesimo somntwana.”
Ngokutsho kukaSibanda, udaba lolu luzakuya emthethwandaba lapho uMahachi azimisele ukuthi azixazulule.
“Sesiqalisile ukulungisisa amaphepha wokuthi siye emthethwandaba ukuze kuvezwe iqiniso elizagcona amahemuhemu la aphuma kumaphephandaba.”
Kusenjalo, uMahachi kukhanya ulokhe eqina ngokukhomba iminwe esethesa odadewabo lezihlobo eziseduze ngokuxolela uMaritha Ndlovu kuloba yikuphi okubi ayekwenzile.
iMpilo hospital
Abaseduzane loMahachi babika ukuba umdlali wenguqu lo wethesa icala lokutsha komntwana kunina womntwana uMaritha.
Kuvidiyo ye-Asakhane Live ebiphume kuFacebook, umdlali lo wabika ukuba umsulwa.
“Kulula ukuthi abantu bakholwe loba yini abayibalayo.
Okwakuqala, imifanekiso yendodana yami isigcwele yonke indawo. Kungani abantu besabalalisa imifanekiso yomntanami esebuhlungwini? Okwesibili, abantu bathi ngisebenzise indodana yami ukwenza imali. Ngingayilimaza njani indodana yami ngenxa yemikhuba yemali?
“Into le ingizwisa ubuhlungu ngoba akekho ofuna ukuzwa umbono wami kulokhu. Odadewethu bayazi into abayenzayo. Indodana yami isuke eSouth Africa ingalimalanga, yayilungile futhi yayihamba,” nguMahachi lo ekhuluma kulividiyo.
Odadewabo bakaMahachi laba akhuluma ngabo kubikwa nguMeline Mahachi loSinikiwe Sibanda.
Kuloludaba, kwabikwa ukuba isihlobo esiseduze esingathandanga ukuqanjwa sabika ukuba uMaritha umsulwa njalo uMahachi wayeqamba amanga ngoba nguye yedwa owaziyo ukuthi kwenzakalani kundodana yakhe eGoli.
“Umntwana wasuka eSouth Africa enjalo. Nxa esola odadewethu kungani bengabotshwa?
UMaritha akayitshisanga ingane yakhe yingakho laye ekhululekile.”
UMahachi uke waphuma kumaphephandaba esithi ukutsha komntanakhe kubangelwe ngondofa.
