uMthunywa
YiNtatheli kaMthunywa
ZILOKHU zibabaza izakhamizi zeMukhoba Compound eMpoyeni ngemva kokuba enye indoda ihlahlele enye ngehloka ekhanda kubangwa utshwala ngeviki ephelileyo.
Kubikwa uNkosana Bhebhe oleminyaka engu- 29 yokuzalwa waya ezitolo esiyathenga ukudla. Kubikwa u-Omphile Dube oleminyaka engu- 26 labangani bakhe bathi bembona bathi kabathengele utshwala yena wala esithi yena uzethenga ukudla kwakhe. Esehamba bamlandela bamthola eMathonsi Mine lapho abamgamula ngehloka qede bamkhuthuza i-1500 rand babaleka batshiya ebangwa lezibi.
Ekhuluma lentatheli kaMthunywa uMnumuzana Philani Moyo uveze ukuthi yena wayezikwejisela labangane bakhe babona uNkosana ezozithengela ayelande ukuzokuthenga wathi esesuka u-Omphile labangane bakhe bamlandela bacela ukuba abathengele utshwala yena wala ethi uzothenga ukudla kwakhe.
“Thina sasizihlalele nje sizikwejisela nje kwafika uNkosana ezothenga u-Omphile labangane bakhe bahle bamlandela bethi bafuna abathengele utshwala wala bahle bamzondela ukuthi kungani esala ukubathengela yena imali elayo. Uthe eseqedile ukuthenga esebuyela ngekhaya bamlandela bafika baxabana laye andubana bamgamule wasala ebangwa lezibi, phezu kwalokhu bamthathela imali engange i-1500 rand babaleka.”
Uqhubekele phambili esithi kube kuhle ukuba u-OMphile abotshwe ngoba bamhlukuluza abantu bekhangele ezitolo lanxa sokuthiwa uNkosana utholakale ebangwa lezibi kwaba lula ukuba abomthetho bathole umkhondo walabo abamlimazayo.
“Bamhlasela sikhangele ezitolo njalo bamlandela wonke umuntu ekhangele lanxa sesisizwa kuthiwa uNkosana utholakale ebangwa lezibi kuhle kwabalula ukuthi izakhamizi zazise abomthetho ukuba abantu abenze ubudlwangudlwangu lobu ngobani. Uhle wathwalelwa esibhedlela lapho abangwa khona lezibi asazi ukuba amadlozi akhe azamlwela ethini,” kutsho uMnu Moyo.
Isikhulumi samapholisa esabelweni seMatabeleland South u-Inspector Philisani Ndebele ebuzwa ngodaba lolu uvumile wathi udaba lolu solufikile ehofosini labo njalo baxhwayisa uzulu ukuba engabo hamba ethwele izikhali ngoba zingavunyelwa.
“Uzulu kumele alandele izixwayiso esimupha zona ngokuhamba ethwele izikhali ezilakho ukulimaza abantu. Zikhali ziyingozi ngoba ungazonda uthwele isikhali akwaziwa ukuthi ungenzani. “Abatholakala bethwele izikhali lezi umthetho uzabajesisa,” kuphetha u-Insp Ndebele.
