uMthunywa
Blessing Moyo
INKAMPANI yeNashcon eseKelvin isilungise amaklebhu ezifuyo athwalekayo angasetshenziswa ngabalimi ukunathisela lokufaka ukudla kwezifuyo.
Ekhuluma lentanteli kaMthunywa eZimbabwe International Trade Fair uMnunzana uBigboy Ngwenya ubike ukuba inkampani yakhe esilomnyaka isunguliwe, iphume leqhinga lokwenza amaklebhu athwalekayo ukuze kubelula kubalimi ukuwafaka lapho abafuna khona kunye lokuwagezisa.
“Inkampani yeNashcon isilomnyaka isunguliwe, injongo yethu yikuthi siphathise abalimi babe lendawo zezifuyo zokudlela eziqinileyo ezingeke zibulawe yiloba yisiphi isifuyo.
“Ama-feeder la alusizo kubalimi ngoba bayenelisa ukuwathwala bayewafaka lapho abafuna khona,” kutsho uMnu Ngwenya.
“Amaklebhu la ngawokudlela kanye lokunathela inkomo, imbuzi kanye lengulube. Siwalungisa ngesamende sibe sesiwaqinisa ngensimbi kanye lokhethe. Isakhiwo esakhiwa ngalezi impahla siyabe siqinile, asidiliki yikho sikhethe ukusebenzisa impahla le.
Uqhubeke echaza ukuthi amaklebhu la angafakwa amanzi amanengi futhi kulula ukuwahlanza.
“Izitsha zokunathela ezibizwa kuthiwe yiJumbo Water Trough zithwala amanzi angaba ngamalitha angu-1 400, yona iyabe iyi 3,6m x 80cm x 60cm ubukhulu. Esinye njalo isitsha sengulube esibizwa kuthiwe yiPig Feeding and Drinking Trough ubukhulu singaba yi 1,06m x 53cm x 37cm, ithwala amanzi angaba ngamalitha afika 100,” kutsho uMnu Ngwenya.
Uphethe ngokuthi bayenelisa njalo ukwenza amabholoho amancane kunye lokuthwalela abathengi babo bayebatshiya lapho abayakhona.
