Uncategorized

Balobolisa umntwana (13) kundoda eyibhonki

28 Mar, 2019 - 00:03 0 Views
Balobolisa umntwana (13) kundoda eyibhonki

uMthunywa

Thokozile Mbedzi

KULEMULI ezimbili zesigabeni seManyadze ngaphansi kwenduna uChireya, ezisele zigujwa zinhloni ngemva kokuba zimiswe phambi kwedale lenduna zisetheswa umlandu wokulobolisa umntwana oleminyaka engu-13 phezu kwalokhu esendiselwa endodeni engaphilanga kuhle engqondweni.

Umntwana lo kubikwa uqede iminyaka emibili engazange abanjwe ngumkakhe uAlexander Mananda oleminyaka yokuzalwa engu-28 okubangele uninazala ukuthi ahambe ayethetha emangcwabeni okubangele ukuthi ngalobobusuku umntwana abone eselala lendoda emfitshane elendevu ezitshaya emadolweni okucatshangelwa ukuthi kungaba kungutikoloshi. 

Indaba le ivele ngesikhathi uyise womntwana uMnumzana Matanda esiyamangalela imuli yako Mananda ngokwehluleka ukumnika inkomo zakhe ayezibizile eziphakathi kwezingu-10 le 13. 

Esinye isakhamuzi esixoxe loMthunywa esasikhona enkundleni ngeSonto uNkosazana Sekayi Moyo sithe abantu bathukuthele ngendaba yokulotsholiswa komntwana emncane.     

“Indaba yokulotsholiswa komntwana wakoMatanda ibisihlukumeza thina njengabesifazane ukuthi kambe umntwana omncane kanje angathiwa kathathwe yindoda engaphilanga kuhle engqondweni.

“Kuhle ngoba uyise uze wazihambela yedwa enduneni ethi uyadinga uncedo lokuthi aphiwe inkomo zakhe zamalobolo kanti sesiyazibophisa,” kutsho uNkszn Moyo. 

Induna uChiya Chireya ebuzwa ngaloludaba uvumile ukuthi luthonisiwe edale lakhe ngempelaviki.

“Njengomphathi wesigaba ngemva kokuzwa isikhalazo sikaMutanda sokunganikwa amalobolo akhe ngabiza imuli zombili ukuze ngizozwisisa kuhle indaba le ngingakethuli isinqumo.

“Kwavela ukuthi uMutanda uvele wephula umthetho ngokwendisa indodakazi yakhe ileminyaka engu-13.

“Kukhanya umntwana lo ubeseleminyaka emibili ehlezi kwabozala kodwa ubengakaze abanjwe ngumkakhe okwenza uninazala wacina wahamba laye emathuneni esiyathetha okwabangela ukuthi ngalobo busuku kuthutshe indoda emfitshane elendevu ezitshaya emadolweni yazohlangana laye amacansini,” yinduna uChireya lo.

Induna uChireya ikhuthaze umphakathi ukuthi aqaphele abadala abadinga inotho besebenzisa abantwababo. Uthe lokhu kulicala ngoba akulamntwana oleminyaka engaphansi kwe16 ongendiswa. 

Induna idlulisele phambili ukuthonisiswa kwendaba le kulindelwe ukuthi usebele kaMutanda uNkosikazi Mananda achasise ngesintu asenzayo emathuneni okuyikho okwabangela ukuthi kubelendoda emfitshane eyalanda umalukazana wakhe phakathi kobusuku.  

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds