uMthunywa
Thokozile Mbedzi
ABALIMI beBeitbridge sebekhuthazwe ukuthi bangene kuhlelo lweMontana Meats lona oluphathisa abalimi ngokudla kwezifuyo ngesikhathi ukudla kwazo kusilela.
Inkampani yeMontana Meats yiyo ethenga inyama ezilaheni zendaweni yeBeitbridge.
Ekhuluma lentatheli kaMthunywa uProvincial Agritex Officer wesabelweni seMatabeleland South, uMnumzana Mawocha Masawuso uthe abalimi beBeitbridge kumele bamukele uhlelo olulethwe ngabeMontana ngoba kuluhlelo oluhle njalo olulakho ukubasiza kubhizimusi labo lokufuya.
“Inkampani yeMontana iza kithi kunye lengatsha zonke zalapha eBeitbridge ezibalisela iRural District Council lezinye bezokwethula uhlelo lokuba bona bazaphathisa abalimi ngokudla kwezifuyo zabo.
“Ngaphansi kwaloluhlelo abalimi benza isivumelwano sokuba inkampani yeMontana ithatha inkomo eziyisilinganiso se-20 phesenti zomlimi kodwa zinikwe ukudla zonke andubana zithengiswe nxa sezilesisindo esifunakalayo,” kutsho uMnu Masawuso.
Kubikwa inkomo lezo ezibanjwa yiMontana yizo ezibhadala imali yokudla lokho.
“Umlimi kungathengiswa inkomo ebezibanjwe yinkampani yeMontana ulakho okuyimadlana nxa kungenzakala ukuthi zithengwe ngemali edlula intengo yokudla ezikudlayo.
“Isibonelo nxa umlimi elenkomo ezingu-100 inkampani iyavumelana lomlimi ukuba akhuphe ezingu-20 zibe yisibambiso sokuba yizo ezizathengiswa nxa seziqinile. Nxa lokho ukudla kubuya kunikwa inkomo zonke ezisesibayeni.
“Lolu luhlelo oluhle kakhulu ngoba indawo yeBeitbridge yandise ukulahlekelwa zinkomo ezinengi kakhulu ngenxa yokucuba.
Kubikwa nyakenye abalimi beBeitbridge balahlekelwa zinkomo ezingafika 459 khonapho eyodwa ilakho ukuthengiswa ngeRTGS$800 kusiya kuRTGS$1 000.
