uMthunywa
Thokozile Mbedzi
ABALIMI kundawana zonke bacetshiswa ukuba sokulendlela elula yokudibhisa inkomo elondoloza amanzi, umuthi, isikhathi kunye lokuncedisa ukuba izifuyo zingahambi imango emide.
Ekhuluma lentatheli kaMthunywa uMnumzana Jefta Manwa owenhlanganiso yeTarget Livestock Consultancy ubike ukuthi abalimi kundawana zonke kumele bakhuthazwe ukuba bafunde lindlela elula yokudibhisa inkomo entsha ngoba iyalondoloza idibha, amanzi, isikhathi kunye lokuncedisa ukuba izifuyo zingahambi imango emide kakhulu.
“Abalimi kumele bafunde indlela entsha le ngoba iyehlisa indleko zokuthenga idibha, ukuhambisa izifuyo imango emide zisiya edibha ngoba lonyaka sikhangelane lendlala.
“Kungakho izifuyo akumelanga zihambe kakhulu ngoba kudala ukuba ziphangise ukucaka ikakhulu kulabo abangaziniki okunye ukudla.
“Indlela le yokudibhisa inkomo isebenzisa indawo encane lapho okuzadibhiswa khona inkomo njalo kusetshenziswa amazenge lempompi emaceleni njalo siphinde sifulele ngawo. Ngaphansi silungise njalo ngendlela elobunono ukwenzela ukuba nxa inkomo ingangena isidibha lihle liyithele engathi yi-shower ngakho idibha leli liyaphinda njalo libuyele lapho eliyabe lipontshwa khona nge-generator. Kungaba yisigubhu samanzi esingaba ngamalitha angu-60 kumbe ukwedlula kusiya ngokuthi umlimi ulenkomo ezingaki.
Uqhubekele phambili uMnu Manwa esithi lindlela iyalondoloza idibha ngoba abalimi belakho ukusebenzisa idibha leli kabili loba kathathu.
“Abalimi indlela le iyabasiza ekulondolozeni idibha ngoba balakho ukulisebenzisa kabili loba kathathu ngoba liyabuyela lapho elipontshwa khona nxa liqeda ukudibhisa inkomo.
“Sikhuthaza abalimi ukuba indlela le bayilandele njalo bayisebenzise ngoba iphathisa umlimi kakhulu ngesikhathi, ukungahambisi izifuyo imango emide kunye lokulondoloza idibha,” kuphetha uMnu Mamwa.
