‘Balimi hlakulani amasimu’

29 Aug, 2019 - 00:08 0 Views
‘Balimi hlakulani amasimu’ Emasimini

uMthunywa

Bongani Ndlovu

BALIMI sebekhuthazwe ukuba bengavilaphi ukuhlakulela izilimo zabo njengoba isikhathi sezulu sesisondele.

UMthunywa ukhulumisane loMnumzana Philani Maphosa ongumlimi esigabeni seGwanda obike ukuthi ukuhlakulela kungumanqoba ngoba izilimo zikhula kuhle.

“Njengoba isikhathi sezulu sesisondele sithanda ukuxwayisa abalimi abavilapha ukuhlakulela izilimo zabo ukuthi lonyaka asihlakuleni ngoba kungumanqoba ukuhlakula.”

“Uyathola emasimini kulokhula olulingana lomumbu kucine kungasakhanyi ukuthi umumbu yiwuphi okuyinto engalungelanga izilimo,” kuchaza uMnu Maphosa.

Ubuye wathi abalimi bengekela izilimo zibe lokhula luyavimba ukuthi izilimo zithole kuhle amanzi.

“Ukhula luthathela izilimo amanzi ngakho kuqakathekile ukuhlakulela izilimo zakho kukhitshwe ukhula, ngokwenza lokho izilimo zikhula ngendlela efaneleyo.

“Okunye njalo ukuhlakula izilimo ezinjengomumbu kumele kwenziwe ngonanzelelo ngoba umumbu ukhula ungalingani ngakho kulomunye oyabe ukhona umila osungaphambaniseka lapho umlimi ehlakula,” utsho njalo uMnu Maphosa.

Uqhubeke esithi ukuhlakula akuncedisi ekuqedeni ukhula kuphela kodwa kuphathisa izilimo ngokudla.

“Ngaphandle kwalokho ukuhlakula kwengeza ukudla emhlabathini ngoba uyabe usuphendule umhlabathi ophezulu usungene phansi, nxa ungasaphendulanga ukudla kuyabe kuphezulu emhlabathini kuphela. Lokhu kuvumela ukuthi ukudla kungene phansi njalo kuhle kuvumele lokuthi umoya ozaphathisa impande zezilimo ungene izilimo zikhule kuhle.”

Uqhubeke esithi umlimi ohlakulela izilimo wandise ukuthola isivuno esihle kulalabo abavilapha ukuhlakulela.

“Ubuhle bokuhlakula yikuthi abalimi abahlakula izilimo zabo balokuthola inzuzo ephezulu kulalabo abangahlakuleliyo izilimo zabo ngoba izilimo ziyabe zikhule zingahwabelani lokhula ukudla lamanzi lapho zikhula okwenza ukuba zikhule ziqinile,” kuphetha uMnu Maphosa.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds