uMthunywa
Nkosilathi Sibanda
IQEMBU leZimbabwe ele-basketball labesilisa lidanise kakhulu ngoLwesibili ngemva kokunqotshwa ngeleMozambique nge 71-59 kumdlalo we-final yeFiba Zone Six AfroCan odlalelwe eZimbabwe International Trade Fair Hall.
Ngaphambili kokuthi zidibane, amaqembu womabili ebemi ngokulingana kabili kulumqhudelwano, okuyikho okubize ababukeli abanengi abakade befuna ukubona ukuthi yiphi ezaphetha ikhokhele.
Ababukeli abalandela iZimbabwe bagcwalise phamu inkundla yeTrade Fair kodwa badaniswa yikwehluleka kwabafana babo. Lobungcitshi bukaVitalis Chikoko abuzange bubonakale mhla welanga.
IQEMBU leZimbabwe ele-basketball labesilisa lidanise kakhulu ngoLwesibili ngemva kokunqotshwa ngeleMozambique nge 71-59 kumdlalo we-final yeFiba Zone Six AfroCan odlalelwe eZimbabwe International Trade Fair Hall.
IZimbabwe inqobe umdlalo wokuqala 71-57 ngaphambi kokuthi iMozambique inqobe ngo 66-53 emdlalweni wesibili zidibene.
Kumdlalo wangoLwesibili iMozambique igijime phambili yaqeda isigaba sakuqala ikhokhela nge 25-15. Lapha yikho okuhle kwacacisa ukuba iZimbabwe izasalela emuva ngoba ayizange yenelise ukuthi ihlohle amabhola amanengi.
Kusigaba sesibili iMozambique yandise amabhola ebhasikitini yaqhubeka ikhokhela, ivule isikhala semiklomelo elitshumi.
IZimbabwe izame ukwehlisa lokhu, yasondelela kusigaba sesithathu esiphethe kuyi 56-46, iMozambique ilokhe iphezulu.
Umdlali uNowa Penduka utshayele iZimbabwe imiklomelo engu-12. U-Elves Houana ubengumdlali owenze kuhle kuqembu leMozambique ngokuhlohla imiklomelo engu-18.
Zimbabwe International Trade Fair Hall.
Kusenjalo iFiba Africa izolo iqinisekise ukuba ilizwe le-Angola yilo elizaphatha imidlalo ye-2023 Fiba AfroCan mhlaka 8 kusiya ku 16 Ntulikazi.
I-Angola iba yilizwe lesibili ukuphatha imidlalo le, ilandela iMali eyaphatha imidlalo 2019.
I-Fiba AfroCan ngumqhudelwano wamazwe alitshumi lambili.
Ekhuluma lephephandaba likazulu ngoLwesibili, ngemva komdlalo, umongameli weBasketball Union of Zimbabwe uJoe Mujuru uthe baqhube kuhle umncintiswano wabo.
“Imidlalo yethu iqhube kuhle. Sibonga bonke abasiphathisileyo kulokhu. Sithi amhlophe kusizwe seMozambique ngokuqeda bezintshantshu,” kutsho uMujuru.
