uMthunywa
Nkosilathi Sibanda
UKUKHALIPHA kukaThulani Sibanda kuzabonakala ngoMgqibelo mhla iBulawayo Chiefs ihlasela iBlack Rhinos enkundleni yeMandava kunkezo yeChibuku Super.
Zombili zingena kumbango walinkezo esifike kubanga lama-semi final. Ngelanga linye kuzadlala njalo iFC Platinum leHerentals enkundleni efanayo.
Kumidlalo le, iBulawayo Chiefs leHerentals zikhangelelwa phansi ngoba kunakanwa ukuthi zingamaqembu asacathula kunguqu yakuleli, kodwa ukufika kwazo kulesi isibanga somdlalo kwethuse abanengi abakade bengacabangeli.
Ekhuluma lentatheli kaMthunywa ngoLwesithathu emini, isikhulumi sePSL uKudzai Bare uthe isizatho sokuthi baqhube imidlalo emibili le enkundleni eyodwa sidalwe yikuthi bafuna ukukholisisa abalandeli bebhola edolobheni leZvishavane.
“Ibanga lama-semi-final enkezo yeChibuku Super Cup selifikile. Sithanda ukwazisa abathandi bomdlalo labasekeli bamaqembu ukuthi imidlalo yonke izadlalelwa enkundleni yeMandava ngoMgqibelo,” kutsho uBare.
Chibuku-Super-Cup
“Lokhu sikwenzele bona abasekeli bomdlalo abakhulisa umdlalo wethu.”
Umdlalo wakuqala, phakathi kweBulawayo Chiefs leBlack Rhinos uzadlalwa ngehola lokuqala emini.
IHerentals leFC Platinum zizalandela ngehola lesithathu.
Kumqeqetshi weChiefs, uSibanda, lo ngumdlalo obaluleke kabanzi ngoba utshiyelwe ingqobe nguNilton Terroso, obekhuza leli qembu, andubana abuyele kibo kwelePortugal.
USibanda ulomsebenzi omkhulu wokuthi adlulise amaqembu la kusigaba esilandelayo somncintiswano. Ukukhalipha kwakhe kuzavela kulumdlalo, loba nje kusaziwa ukuthi nguye obeletha amacebo okunqoba kuTerroso kumidlalo edluleyo.
Ukuchinsa ukufika kulumncintiswano kubeyinhlanhla uSibanda angeke ayiphosele khatshana. Abadlali bakhe bakwenza kwabalula ngokunqoba ezinkulu iHighlanders nge 1-0, banqoba njalo le-ZPC Kariba nge 1-0.
Ngendlela Amakhosi Amahle ahlasela ngayo, angeke kumangalise ukuthi adlule egijima phezulu kwamasotsha eBlack Rhinos.
Inkuthazo yokunqoba kulumdlalo izavela kumbiko wokuthi i-final yeChibuku Super izaqhutshelwa enkundleni yeBarbourfields koBulawayo mhlaka 19 Lwezi.
Kusenjalo, iChiefs imemezele ukuthi uTerroso uzancedisa uSibanda ngokuqeqetsha esePortugal.
Kubikwa uzaqeqetsha ngokuthumela imbiko ekibo ePortugal lakumidlalo eseleyo kuligi yeCastle Lager.
Lokhu kungenxa yokuba i-permit evumela ukuthi asebenze kuleli isiyedlule. Ubevunyelwe ukuthi aqeqetshe Amakhosi Amahle okomnyaka owodwa.
Umbiko ophuma kuleli iqembu uveza ukuba loba uTerroso uzabe esePortugal, uzaqhubeka eqeqetsha iqembu ngokuncedisa ngamacebo alawo.
