uMthunywa
Gibson Mhaka
KWENZEKE imihlolo esikolo seManjolo Primary eBinga ngesikhathi abazali bekhipha abafundi emakilasini besithi kumele bayegeziswa “amadimoni” asehlasele lesi isikolo ngeviki edluleyo.
Kubikwa abafundi bakhonone ngokuthi abahlaliseki nxa bephakathi kwezifundo okudale ukuthi abazali babize uMphurofethi uEmmanuel Mutumwa ukuthi akhulekele abantwana lababalisi.
Omunye wabazali, uJennie Mudimba, ubikele intatheli, waveza ukuthi kukhona okungayisikho obekukhathaza esikolo lesi, okubafuqe ukuthi banxuse umphurofethi uMutumwa owebandla lamapostoli aweJohane Masowe.
“Ngemva kokuhlutshwa yizinto esicabangela ukuthi ngeze-satanism ebezihlukumeza abantwana, sicele uMphurofethi uMutumwa ukuthi aze lapha. Sifuna ukuthi abantwabethu bafunde endaweni elokuthula,” kutsho uMudimba.
Abazali bathe ukuhlaselwa kwabantwababo kubazwisa ubuhlungu ngoba abanye abafundi kubikwa bebesiwa nje, bavuke amadimoni.
“Kuyasikhathaza njengabazali njalo sihlalele evalweni ngempilo yabantwabethu, yikho sithe uMphurofethi uMutumwa asincedise.”
UMutumwa uqinisekise ngaloludaba, wathi ngempela ubizwe eManjolo wafika wahlanza isikolo, welapha abafundi.
“Ngibizwe ngabazali ngemva kokukhalaza kwabo ngemisebenzi ye-satanism esesikolo lapho abafundi abakade besiwa bebanjwe ngumoya abangawaziyo,” kutsho uMutumwa.
“Kunakanelwa ukuthi kulombalisi obehuga abantwana ukuthi bangene ku-satanism njalo kulabanye ababalisi akade bengasafuni ukufundisa ngenxa yalokhu.
“Kodwa, okumangalise abazali lababalisi yikuthi nxa abantwana sebephindele emakhaya abo, ukuhlukunyezwa bekuphela. Bekusenzakala nxa besesikolo kuphela.”
Omunye wababalisi uthe kuliqiniso sibili ukuthi imisebenzi ye-satanism ibihlupha esikolo sabo.
Umqondisi wezokukhitshwa kwembiko kugatsha lwe-Primary and Secondary Education kuHulumende, uMnumzana Taungana Ndoro, kazange esaphendula imibuzo ngaloludaba.
