uMthunywa
Nkosilathi Sibanda
INHLANGANISO yePremier Soccer League isize yavula umlomo mayelana lodlakela olwaqhamuka mhla kudlala iFC Platinum leHighlanders.
NgoMgqibelo amapholisa athwala nzima ukuqeda umsindo kubasekeli beHighlanders ngemva kokuba unompembe uKuzivakwamwari Jaravaza enikeze iFC Platinum umbekwa ngomzuzu wesi-82.
Umdlalo lo ubusenkundleni yeMandava.
Umdlali weBosso uPeter Muduhwa wagwetshwa nguJaravaza kulandela ukudlalisa kabi uWalter Musona weFC Platinum ebhokisini.
uPeter Muduhwa
Abalandeli beHighlanders abazange bavume umbono kaJaravaza.
Baphendule ngokungena enkundleni bekhangele omunye wabasekeli bakanompembe lo.
Labadlali beHighlanders labo batshengisele enkundleni ngokwala lesi isinqumo sikanompembe.
Akuzange kuthathe isikhathi amapholisa esexotshanisa abalandeli beHighlanders, sekujikwe le-tear gas.
Phandle kwenkundla kwaba yisiphithiphithi amapholisa esetshaya abalandeli beqembu elikhulu.
Ngaleso isikhathi, zombili bezingutshiki lobhanqa 1-1.
Ngemva kwamalanga amathathu, inhlanganiso yePSL ize yakhipha umbiko igcona okwenzakale enkundleni yeMandava.
“I-Premier Soccer League isithole imbiko yomdlalo evela kuFC Platinum kanye leHighlanders kulandela izehlakalo zokuhlukulwa kwabantu okwenzakale emdlalweni weCastle Lager PSL mhlaka 23 Mabasa 2022 enkundleni yeMandava.
“Okwamanje silinde umbiko ovela kumapholisa eZimbabwe Republic Police ngaphambi kokuthi siqale ukuqondiswa kwezigilamkhuba,” kutsho iPSL.
Inhlanganiso le ithe ikhathazekile ngokwanda kodlame emdlalweni.
“I-PSL ikhathazekile ngezenzo zodlame lobudlwangudlwangu ebholeni.
Okwamanje sixoxisana labo bonke abathintekayo ukuze kutholakale isixazululo esizakuma siqine.”
Amaqembu acelwe ukuba afundise abalandeli bawo ngemithetho yomdlalo.
“Sikhuthaza amaqembu ukuthi axhumane labalandeli batshelwe ukuthi kumele balandele imithetho yePSL.
Abalandeli kufanele bazi ukuthi isinqumo sikanompembe asiphikiswa.
Ukungena enkundleni umdlalo ungakaqalisi, phakathi lalapho usuphelile umdlalo kulicala.”
IPSL iqhubeke yabika ukuba isithole izikhalazo ezinengi mayelana ngabonompembe.
“Lanxa singalukhuthazi udlame, sithanda ukunanzelela ukuthi sesithole izikhalazo ezinengi mayelana labaphathi bemidlalo yePSL ngakho siyanxusa ukuthi ikhomithi yeZifa iluhlolisise udaba lolu.”
