uMthunywa
Thokozile Mbedzi
IZAKHAMIZI esigabeni sakoChireya eGokwe ziphakathi kokujabula okukhulu ngemva kokunikwa umvundiso ngeviki ephelileyo ngaphansi kohlelo lukaHulumende lokutholisa abantu impahla yokulima.
Kubikwa izakhamizi lezi bezinikwa i-50kg yefethalayiza.
Ikhuluma lentatheli kaMthunywa induna yakulindawo uChiya Chireya uthe balokujabula okukhulu njengesigaba ngohlelo lukaHulumende lolu olufike ngesikhathi esifaneleyo lapho bonke sebelungele ukulima.
“Ngilokuthokoza okukhulu kakhulu njengomphathi wabantu ngoba izakhamizi zonke ziyitholile ifethalayiza. Okunye okungijabulisayo yikuthi ifethalayiza le ibuye ngesikhathi esiqondileyo abantu bonke sebelungele ukulima.
“Inengi lezakhamizi belingenelisi ukuzithengela ifethalayiza le kungakho siyambonga uHulumende wethu ngokusiphathisa ngenhlanyelo.
“Indawo yethu yindawo egxile kwezokulima ngakho nxa uHulumende kunye lamankampani afana leCottco esixhasa ngenhlanyelo lefethalayiza sizasebenza gadalala ukuze sithuthukise izimuli zethu kunye lesisizwe sethu,” kuchaza induna uChireya.
Uphinde waxwayisa izakhamizi ukuba zitshiye umkhuba wokuthengisa impahla abayinikwa nguHulumende.
“Ngifuna ukuxwayisa njalo izakhamizi ukuthi zitshiyane lomkhuba wokuthengisa ifethalayiza esiyiphiwayo ngoba laye uHulumende kunye lenhlanganiso asebenzelana lazo bonke bafisa ukubona izithelo zokusiphathisa ngempahla yokulima.
“Okunye njalo engikucela kubalimi yikuthi balandele izixwayiso abaziphiwa ngabalimisi ngoba umkhathi usuguqukile, akusafanani lakudala. Kungakho abalimi kumele basondele duzane labalimisi babo ukuze babe lesivuno esihle,” kuphetha induna uChireya.
