Uncategorized

Bahlaselwa yimigulukudu besesilindweni samabhasi

09 May, 2024 - 00:05 0 Views
Bahlaselwa yimigulukudu  besesilindweni samabhasi

uMthunywa

Langelihle Moyo

KULEZAKHAMIZI ezintathu zesigabeni se-Mawayilesini eNsuza ezihlaselwa yimigulukudu emihlanu ngeSonto, zisesilindweni samabhasi emgwaqweni omkhulu osuka koBulawayo usiya-eFolosi. 

Kubikwa ngeSonto mhlaka 5 kuyonale inyanga uLearnmore Shava, Edwell Gavakava loTamirirashe Mpofu, babesesilindweni samabhasi emgwaqweni osuka koBulawayo usiya eFolosi bedinga imota eyayizabathwala besiya enkonzweni. Bathe besalibele kwathutsha imota yohlobo lwe-Nissan Hardbody Twin-Cab, kwehla amadoda amahlanu ehlome ngamahloka lamabhemba. Abasolwa  ababili baqonda ku-Gavakava owayehlezi yedwa bucwadlwana labanye bakhe, bafika bathi kabaphe imali,  engakaphenduli omunye umsolwa wamtshaya ngomphini wehloka emadolweni. Ngemva kwalokho basebembopha izandla ngentambo yezicathulo bamkhuthuza bathatha umakhalekhukhwini wohlobo lweTecno.

Kuvezwe njalo ukuthi laba abanye abasolwa ababili balanda omamangala ababili uShava lo Mpofu, bafika babatshaya ngesidindi sehloka. UMpofu wenelisa ukubaleka, basebesala bebopha uShava izandla ngentambo yezicathulo. Ngemva kwalokho bamkhuthuza bamthathela i-US$160,00 lomakhalekhukhwini wohlobo lwe-Huawei Y9.  Ngemva kwalokhu bangena emoteni yabo babaleka  belubhekise koBulawayo. Omamangala basala benelisa ukuzikhulula bahamba bayamangala emapholiseni eNsuza.

Isikhulumi samapholisa eMatabeleland North uInspector Glory Banda uthe udaba lolu lwabikwa emapholiseni, kodwa imigulukudu le ayikabanjwa.

“Udaba lolu lusezandleni zamapholisa, njalo imigulukudu le ayikabanjwa. Ngakho-ke amapholisa asachwayisisa ngokugcweleyo ngodaba lolu. Omamangala bagijinyiselwa ekilinika ye-Mbembesi ngoba omunye wayevuvukile edolweni, besokusithi omunye wayelesilonda sokuhlahlelwa ekhanda lezinye imvimvinya emzimbeni, omunye njalo wayesizwa ubuhlungu emhlane. Ekufikeni kwabo ekilinika badluliselwa esibhedlela se-St Luke’s ukuthi bayekwelatshwa khona. Kodwa kukhanya baqhuba kuhle esibhedlela,” kuphetha uInsp Banda.

 

 

 

Share This:

Sponsored Links

Survey


We value your opinion! Take a moment to complete our survey

This will close in 20 seconds