uMthunywa
Nkosilathi Sibanda
NGESIKHATHI umdlalo wenguqu umisiwe ngenxa yegcikwane le-Covid 19, abadlali beHighlanders bacabange ukuthi bakhalale umdlalo.
Kubeyisiphithiphithi emawofisini aleliqembu koBulawayo ngoLwesithathu emini lapho abadlali abedlula itshumi abafike balinda emnyango besithi bafuna ukukhuluma lomgcinisihlalo uJohnfat Sibanda.
Sokungokwesibili abadlali bekhalala umsebenzi wabo lonyaka. Loba bengadlali, isivumelwano abalaso leqembu yikuthi kumele bahole. Sekuvele ukuthi akulamali bayiphiwayo kuze kube lakhathesi.
I-Highlanders iphakathi kokuvikela inkezo yayo ye-Chibuku Super kodwa umkhankaso walinkezo wamiswa yinhlanganiso ye-Sports and Recreation Commission ngesikhathi kuqhamuka ukugula kwabantu abanengi.
NgoNhlangula, abadlali bafika bawothamela ilanga enkundleni yeWhite City betshela umqeqetshi ukuthi angeke bagijime belambile.
Iphephandaba likazulu alisatholanga kakuhle ukuthi abadlali bafuna malini kodwa udletshana olukhona yikuthi lokhe iHighlanders yaqala ukuncintisa kunkezo yeChibuku Super, abadlali baphiwa imali kanye kuphela.
IBosso ayikanqotshwa kumidlalo yalumkhankaso wenkezo eyayithwala ngesizini edluleyo.
Njengawo wonke amaqembu akuligi yePremier Soccer League, iHighlanders ithembele kumali ebhadalwa ngababukeli bemidlalo yayo. Kodwa, lonyaka ababukeli abavunyelwa ukungena enkundleni ngenxa yokumemetheka kwegcikwane leCovid-19.
Isikhulumu seBosso uRonald Moyo uthe angeke atsho lutho ngokutheleka kwabadlali. Uthe umaqhuzu weqembu uNhlanhla Dube nguye ongakhuluma kabanzi ngakho.
UDube ubengabambeki ecingweni ngesikhathi iphephandaba likazulu lizama ukuzwa ngokwenzakeleyo.
Omunye wabadlali othande ukungaqanjwa uthe nxa inkokheli zabo zingasoke zibatshele okuzwakayo ngemali, kungcono ukuthi badinge umsebenzi kwamanye amaqembu.
“Sekuyangisa njalo kwenza singazimiseli ukudlalela iqembu. Nxa bengazwakali ngemali yethu, okuhle yikuthi basitshele kusasale sikhathi,” kutsho lumdlali.
