uMthunywa
Listen Ndlovu
IZIGEBENGU ezintathu ebesezihluphile ngokuhlasela zihlomile eGweru zigwetshwe iminyaka engu-54 kulandela ukutholakala zilamacala ayisikhombisa obugebengu, amabili okugqekeza, elokutshontsha lelilodwa elokubhidliza impahla.
Abasolwa abathi uTafara Mabika oleminyaka yokuzalwa engu-23, Blessing Chikomba oleminyaka engu-22, Joseph Moyo oleminyaka engu-22 kanye loDither Chigondo oleminyaka engu-26, bamiswe emthethwandaba kamantshi uMnumzana Mabwe, eGweru mhlaka 23 Nhlangula besetheswa amacala la, alitshumi.
Kubikwa abetheswacala besebehluphile emalokitshini eMkoba leWoodlands ngobugebengu babo.
Kusitatimende esikhitshwe ngamapholisa besazisa uzulu ngosekwenziwe ngamasela abesehluphile, isikhulumi samapholisa eNkabazwe uInspector Emmanuel Mahoko uthe abathathu laba bagwetshwe iminyaka engu-18 ngamunye kulandela ukutholakala belamacala okuhlasela abantu behlome ngamabhemba kunye lengqamu.
Kubikwa umantshi ngemva kokulalela amacala la, uthole abathathu, uTafara Mabika, Blessing Chikomba, Joseph Moyo belamacala akade bewetheswa wanquma ukuba baye ejele okweminyaka engu-18 ngamunye kukanti umsolwa wesine uDither Chigondo utholakale engelacala.
Abane laba bazaphinda njalo baphenduke emthethwandaba mhlaka 7 Ntulikazi bezobhekana lelinye icala lokudlwengula abaletheswayo.
Isikhulumi samapholisa siveze njalo ukuthi sebebophe njalo omunye umetheswacala, uTafara Chirivo oleminyaka yokuzalwa engu-26 osancedisa amapholisa ekuchwayisiseni.
“Sibonga kakhulu umphakathi ngokuqhubeka usisiza ngolwazi olwakhayo,” kutsho uInsp Mahoko.
