uMthunywa
Thokozile Mbedzi
ZlLOKHE zibabaza izakhamizi ze-Upper Rangemore koBulawayo ngemva kokuba amadoda amabili ethumbe abantwana ababili oleminyaka eyisikhombisa lomunye oleminyaka emine ezondele ukuthi katholanga imali kuleyondlu ngesikhathi egqekeza.
Kubikwa uBrighton Ndlovu oleminyaka engu-20 yokuzalwa ohlala e-Upper Rangemore kodwa evela esigabeni seMangwe loThembani Ndlovu bagqekeza ngakibo kwabantwana laba ngoLwesibili ebusuku baqala ukufukuza bedinga imali kodwa bayiswela andubana bathathe umakhalekhukhwini weSamsung, i-Openview decoder, i-torch le-RTGs$300 basebethumba abantwana; oyinkazana oleminyaka eyisikhombisa lomfana oleminyaka emine.
Ababili laba kubikwa bathi besuka labantwana laba babethusela bathi sebesiyahlukuluza emacansini oyinkazana ngoba beswele imali.
Ekhuluma lentatheli kaMthunywa uMelusi Nkomo uthe balesithuli ngesehlakalo esenzakale komakhelwane wabo.
“Sesihlalele evalweni silapha, ngesiga esenzakale komakhelwane. Kugqekeze amadoda amabili athi ebantwaneni kababanike imali. Omdala ole-14 wathi kabalamali kodwa omunye wasala elindile phandle, omunye wangena endlini wafika wavusa abantwana bonke andubana angene kwelinye ikamelo watshontsha iRTGs$300, umakhalekhukhwini wohlobo lweSamsung, idecoder le torch.
“Omunye wabo wasesithi sebehamba lomntwana oleminyaka engu-7 oyinkazana bayomdlwengula longumfana oleminyaka 4. Lokhu akuzange kumphathe kuhle umfowabo oleminyaka engu-14 wazama ukuba alwise amasela la wehluleka abaleka labantwana laba,” kulandisa umakhelwane uNkomo.
Abantwana laba basala sebebikela omakhelwane ngodaba lolu ababaphelekezela emapholiseni.
Isikhulumi samapholisa koBulawayo uInspector Abednico Ncube ebuzwa ngodaba lolu uvumile wathi amapholisa achwayisisa ngodaba lolu.
uInspector Abednico Ncube
“Sichwayisisa udaba lwabantwana ababili oleminyaka engu-7 lole-4 abathunjwe ngamadoda amabili abangenela endlini yabo yamaplanka kungakhiywanga.
“Ngesikhathi abantwana laba behlaselwa kwakungelamuntu omdala ngoba uyise usebenzela ePlumtree kukanti unina laye wayesemsebenzini. Ngelanga elilandelayo amapholisa aqhubeka ngokuphenyisisa abantwana batholakala epulazini lakoUshewekunze okungaba ngamakhilomitha amahlanu nxa usuka ngakibo kwabantwana.
“Batholakala bekwelinye inina elileminyaka engu-33 le-Upper Rangemore sebetshiywe egangeni. Amapholisa axwayisa abazali ukuthi abantwana baye esibhedlela ukuze bayohlolwa,” kutsho uInsp Ncube.
“Amapholisa axwayisa uzulu ikakhulu abazali, izihlobo ukuba bagcine abantwana ngonanzelelo njalo babone ukuthi sonke isikhathi basala lomuntu omdala.
“Sifisa ukubonga njalo inina elathatha abantwana laba labagcina, sikhuthaza uzulu ukuba aqhubekele phambili esenza okuhle ukuze isabelo sethu sibengcono,” kuphetha uInsp Ncube.
