Bagoqwa besemanzi ‘oMaSiziba’

23 Feb, 2023 - 00:02 0 Views
Bagoqwa besemanzi ‘oMaSiziba’ UMbalenhle Jerad

uMthunywa

Nkosilathi Sibanda

UMPHATHINTAMBO wogatsha lwezemidlalo kuHulumende uKirsty Coventry utshayele ihlombe inhlanganiso yeBulawayo Amateur Swimming Association ngokuqeqetsha kuhle ababhukutshi abangamankazana.

UCoventry, owazakhela udumo ngokuba yintshantshu yokubhukutsha kubanga lama-Olympics, uncome abaqeqetshi labazali bakoBulawayo ngesikhathi esamukela izethekeli kumbuthatho we-Zimbabwe Senior National Championships oqhutshelwe echibini le-City Pool.

Umbuthano lo ubuhlanganise amaqembu aphuma kuzabelo eziphatheka kulumdlalo wokubhukutsha kuleli ezibalisela koBulawayo, Matabeleland North, Matabeleland South, Harare leMashonaland Country Districts.

UCoventry uthe uzizwa elokuthaba nxa ebona abantwana abangamankazana bekhuthalela umdlalo.

UKirsty Coventry

“Ngilitshayela ihlombe, ngiphinde ngiphe isibongo esikhulu kunhlanganiso yeBulawayo Amateur Swimming Association. Umsebenzi eliwenzayo uyancomeka,” kutsho uCoventry.

“Ngithabiswa yikuzimisela kwenu ekuphakamiseni ithalenta lamankazana. Lami ngake ngadlula kuleli ibanga, ngancintisa esizibeni lesi.”

Uthe ikhansili yakoBulawayo labazali kumele babongwe ngokuqhubeka besekela umdlalo.

“Angikhohlwanga labazali. Ngithi kini siyaphambili nxa sisekelwa yini kumidlalo efana lokubhukutsha. Usekelo lwenu lubalulekile. Njengoba libona ukuthi isiziba lesi sigcinwe kakuhle, sibonga ikhansili lomphakathi wakoBulawayo ngoqhuba imbuthano enje.”

Kubabhukutshi abangamankazana abahambe phambili emncintiswaneni wezabelo, kuqanjwe uMbalenhle Jerad wakoBulawayo obencintisa kubanga lama-Under 12.

UJared utshengisele ukuthi angenza kuhle ukwedlula uCoventry kwelakusasa nxa esemele ilizwe kumincintiswano ephezulu. Umbhukutshi lo ubuthe imendulo ezedlula ezinhlanu kumahlandla atshiyeneyo. Ithalenta lakhe likhange amehlo kaCoventry labanye abaqeqetshi abangabacuphi bethalenta emdlalweni.

Uqede umncintiswano elemiklomelo engu-111 nanko uthole ku-50m breaststroke, 100m breaststroke, 50m butterfly, 100m butterfly, 200m backstroke, 50m freestyle, 200m individual medley, wabe esethatha isiliva ku-200m breaststroke, 50m 100 000 backstroke, backstroke 50m kanye le-backstroke 100 000m.

UCoventry uthe kusiyaphambili umncintiswano we-Zimbabwe Senior National Championships kuzamele usabalale ngokukhangela ithalenta kundawo ezingaphandle kwamadolobho amakhulu.

Ukubhukutsha kwandise ezikolo ezisemadolobheni, ikakhulu lezo ezilezakhiwo zaphezulu. Inengi labantwana elihlala phandle kwamadolobho alitholi ithuba lokuphatheka emncintiswaneni yokubhukutsha.

Iqembu lababhukutshi abazancintisa kuhlandla lesi-15 le Africa Junior Swimming Championships eSouth Sudan:

Abafana: Tichatonga Makaya (600), Tawanda Chisungo (589), Paul Mipikeni (585), Bjorn Mhlanga (579), De Swart (577), Liam Rumball (565), Ngwenya (556), Khaya Vimba (549), Kalipeng Limbikani (536), Nigel Madziyire (510), Andile Mhlope (510), Tawanda Jani (523), Stanley Mitchell (510) and Emmanuel Sibanda (500). 

Amankazana: Mikayla Makwabara (624), Tanatswa Chandiwana (582), Charlotte Martel (592), Tafadzwa Chandiwana (572), Matida Musere (563), Anje Van As (564), Olivia Accorsi (583), Tori Dawe (622), Taya Smythe (583), Onye Onovo (534), Taya Gray (534), Susie Worsford (529), Rachael Njowola (529) and Vhenekai Dhemba (513).

Share This:

Sponsored Links

Survey


We value your opinion! Take a moment to complete our survey

This will close in 20 seconds