uMthunywa
Blessing Moyo
Induna yesigabeni seZhombe uNtabeni ixotshe omunye umphurofethi obezama ukugcona elinye inina ngobuthakathi kumaviki asanda kwedlula kulandela ukutholakala efake ikhomane lithandelwe ngesikhumba sembuzi ligqizisiwe ubuhlalu engcwabeni lomntwana walelinina.
Kuvele ukuba inina leli elitholakale ukuthi nguMaTshuma nje kuphela labhujelwa ngumntwana oleminyaka emihlanu ngemva kokugula.
Ngemva kweviki kubhubhe umntwana lo omunye oleminyaka elitshumi laye waqala ukugula.
Lokhu kwethusa inina leli okwenza lacabanga ukudinga indlela zokuvikela lo omdala ngoba selilahlekelwe ngomunye umntwana.
Induna uNtabeni yesigabeni seZhombe ibikele uMthunywa ukuba ngenxa yokukhathazwa yisimo elaliphakathi kwaso inina leli ladinga usizo kumphurofethi wesigabeni lesi owafika wathi bazabuya emzini wakhe bazokwenza umlindelo.
“Kubikwa ngesikhathi belungiselela obaba bananzelela ukuthi kwakulonyawo olwalusegumeni abanakanela ukuthi ngolukaShepherd osebenza lomphurofethi.
“Balulonda unyawo lolu bayafika engcwabeni lomntakaMaTshuma bathola ligejiwe emakhanda basebekhangelisisa bathola kulekhomane elomileyo ligoqelwe ngesikhumba sembuzi labuya lagqiziswa ubuhlalu,” kutsho induna.
“Umama lo wangilanda ezongibikela ngesehlakalo indaba yeza enkundleni bafika balilandula icala. “Amapholisa ami abatshaya kancane okwenza uShepherd wacina echaza ukuthi wathunywa ngumphurofethi ukuyafaka ukhomane lolu ukuze inina leli licatshangelwe ukuba lingumthakathi,” kuphetha induna. Induna iphethe ngokuthi ngemva kokuzwa ukuvuma icala kukaShepherd yahle yanquma ukuthi umphurofethi lo asuke esigabeni.
