uMthunywa
UMONGAMELI wenhlanganiso yeNASH u-Arthur Maphosa uthe bazalinda ukuxwayiswa nguHulumende ukuze baqhubeke ngemidlalo ezikolo.
Abaphathi bezikolo sebevumelane ukuthi bame kancane ukuvumela amaqembu ukuthi aqale ukulolonga loba uHulumende wabika ukuthi usevumele ukuvulwa kwemidlalo lasezikolo.
Ngeviki edluleyo uHulumende wabika ukuthi abantwana abaleminyaka engu-14 kusiya ku-18 sebengahlatshwa ijekiseni lokuvikela umkhuhlane we-Covid 19.
Imincintiswano yezikolo kwezemidlalo yacina ukuqhutshwa ngomnyaka ka2019.
Ekhuluma lephephandaba likazulu ngoLwesithathu ekuseni, uMaphosa uthe balethemba lokuthi kusiya phambili nxa isimo seCovid-19 sivumela, bazaqhubeka ngemidlalo.
Ngalesi isikhathi somnyaka izikolo azandisanga ukuba lemidlalo, okutsho ukuba imincintiswano ingaqala ngomnyaka ozayo.
“Sizwile ukuba uHulumende usevumele ukuthi kudlalwe ezikolo,” kutsho uMaphosa ekhuluma lentatheli kucingo.
“Siyakwamukela. Besekubuhlungu ebantwaneni bethu ukungadlali okweminyaka emibili.
“Kodwa simile okwamanje ukuqhubeka ngemincintiswano. Silinde isixwayiso kugatsha lwezemfundo.
Imincintiswano kumele iqhubeke. Ezemidlalo yimpilo.”
Inhlanganiso zeNash leNaph sezihlele iqoqo lokuthi likhombise ugatsha lwezemfundo ngokuphenduka kwemncintiswano.
Imncintiswano yezikolo elodumo ibalisa iCopa Coca-Cola, iTanganda Netball leminye.
