uMthunywa
Ethel Ncube loThokozile Mbedzi
AZILAMATHE izakhamizi zeNtabazinduna eGadadi ngemva kokuba omunye ugogo evuke engasekho emhlabeni ngemva kokudlwengulwa waphinda waqunywa ngengqamu.
Isiga lesi senzakale ngoLwesibili kuyonale iviki lapho umuyi uGladys Mloyi oleminyaka engu-87 etholakale embathiswe ingubo yena esezithulele ingubo zimanzi nte igazi. Kuzwakale ukuba ugogo lo ubethunyelwe iR500 lempahla mhlawumbe yizihlobo zakhe okucatshangelwa ukuba yikho akufeleyo ngoba lempahla ade elazo zitshontshiwe.
Ekhuluma lentatheli omunye wezakhamizi zakule indawo uNkosazana Beauty Ndlovu uveze ukudana okukhulu ngesiga lesi.
“Sidabukile njalo siyesaba ngesikubone lapha. Kambe umuntu angabamba isalukazi iganyavu qede asibulale kulokuthi azithathele imali asitshiye siphila isalukazi seNkosi.
“Ugogo lo ubehlala yedwa njalo ezilungele kuthe omunye umama ojayele ukubuya ezomphekela efike lapho ekhaya ezomkhangela ekuseni wathola emkulwini kuvuliwe wamemeza ethi usevukile ugogo, wayavula endlini yokulala wamemeza wezwa zwi wathi ethi uyavula ingubo wahlangana lao inkemenkeme yendaba. Kubikwa bekusesabeka ingubo zimanzi te ngegazi isalukazi sesiziyele kwelabokhokho,” kubika uNkszn Ndlovu.
Uqhubekele phambili waveza ukuba ugogo ubesanda ukuthunyelwa imali evela eGoli okwenza abantu bacabangele ukuthi ufele lawo marandi.
“Ubethunyezelwe imali, iR500 wathuma abazukulu abangamankazana abahlala komunye umuzi ukuba bayoyithatha njalo bathenge itshukela lakanye bahamba bayabuya letshukela baphenduka lemali yakhe.
“Kukhanya ubulewe ngengqamu njalo engabe ebulewe emadabukakusa ngoba utholakale igazi lilokhe ligeleza phansi kumanzi okokuthi ngumuntu obesanda kudlula. Kubikwa ukuba ubedlwenguliwe okutsho ukuthi baqale bamdlwengula bathatha impahla bambulala babaleka akulamuntu obanjiweyo.
“Okwakhathesi sisemalilweni silande ukuzabeka ugogo,” kutsho uNkszn Ndlovu.
Intatheli ixhumane lokhansila wakuleyondawo uMnumzana Bekithemba Qongo ovumileyo ukuba udaba olunjalo lwenzakale.
“Kuliqiniso lokhu, ugogo kuke kwabalesikhathi lapho ayevakatshe khona wathola indlu yakhe itshile. Khathesi bamdlwengule bambulala ngikhuluma nje siyambeka khathesi lokhu kuyasidanisa kakhulu,” kutsho uMnu Qongo.
