uMthunywa
ABALANDELI beBosso badlela evalweni ngoba bazi mhlophe ukuthi iqembu labo lingadelela, iBlack Rhinos ingavukela phezu kwabo.
Amaqembu la adibana enkundleni yeNational Sports Stadium, eHarare ngoMgqibelo emini.
IBlack Rhinos ingena kulumdlalo imisila iphezulu kulandela ukunqoba kwayo kumdlalo wokuvula isizini lapho eyanqoba khona iCranborne Bullets nge 1-0, kuthi iHighlanders yona yavula inkundla ngokuphetha ingutshiki lobhanqa eqandeni leZPC Kariba.
Bonke abalandeli beHighlanders ababukela umdlalo wabo wakuqala bazavuma ukuthi ukudibana leBlack Rhinos akusoke kube ngumsebenzi olula nanko iqembu leli latshengisela ukuthi alikaqini kangako ngoba abadlali balo basadinga ukuthi baqine imizimba lokujulisisa ingqondo enkundleni.
Kumdlalo wayo leZPC Kariba iBosso yatshengisela ukuhlonipha kakhulu, okwenza yona ingasadlali umdlalo wayo ewujwayeleyo, yacunula abalandeli bayo.
Kuyaziwa ukuthi iBosso ithe iqeda isizini edluleyo ibidlala ibhola lesivuthevuthe elihamba phambili liqonde egedini, kodwa ngeSonto idlale ingathi iyesaba.
Lokhu yikho okungayibuyisela emuva kulisizini njalo kungayitshonisa mhla idibene lamasotsha eBlack Rhinos.
Abalandeli bayo bahlalele evalweni ngoba abakubona ngeSonto kwabatshiya bezibuza ukuthi mhlawumbe umnyama wokwehluleka ukuhlohla owake wabakhona usubuyile futhi.
Loba iHighlanders ingadlalanga kuhle ngempelaviki edluleyo, iBlack Rhinos kuzamele ibophe ziqine nxa ifisa ukunqoba ngoba iTshilamoya ingavuka kumdlalo wesibili wesizini.
Kuzamele imvimbi zeRhinos zibone ukuthi abagadli bakaMadinda Ndlovu abafohli njalo kumele bathandaze kakhulu ukuthi umqeqetshi lo labadlali bakhe benze njengakuviki edluleyo.
Labasekeli beBosso bathe uMadinda kumele atshintshe ukwenza.
“Esakubona eBarbourfields sidlala leZPC Kariba asifuni kukubona futhi. Loba sikumdlalo wakuqala, sihle satshaywa luvalo.
Singena umdlalo lo silovalo,” kutsho uMoses Ndlovu ongomunye wabalandeli beBosso ababizwa ngokuthi yiTeam Away.
Iqula le-Team Away ngelilandela yonke imidlalo yeHighlanders nxa iqembu lisemangweni.
UNduduzo “Teekay” Ncube osekela ekoBulawayo wazise ukuba okumqoka ngomdlalo wabo leRhinos yikuthi baphume eHarare bephethe imiklomelo yonke.
“Okwenzakeleyo kudlulile. Asikholweni ukuthi umango wokuya eHarare awusoke ubenzima. Asambeni siyethatha imiklomelo yonke,” nguNcube lo.
Abanye babalandeli laba ngabakhala ngokuthi uMadinda kumele alungisise indlela afaka ngayo abadlali.
Bakhala ngokuthi uLynoth “Sonjie” Chikuhwa kumele athole umdlalo ongamncedisa phambili, kuthi umdlali wasesiswini uMelikhaya Ncube kumele amekele enze umathanda ukwenzela ukuthi athole kuhle amabhola azawanikeza abagadli.
Ngemva komdlalo owodwa, iHighlanders ihlezi kunombolo yetshumi kulogu.
Imidlalo ekhona kulimpelaviki:
NgoMgqibelo
Black Rhinos v Highlanders (National Sports Stadium) , Ngezi Platinum Stars v Caps United (Baobab), FC Platinum v Cranborne Bullets (Mandava), Chicken Inn v Simba Bhora ( Luveve), Greenfuel v Herentals (Gibbo Stadium)
NgeSonto
Dynamos v Sheasham (National Sports Stadium), Manica Diamonds v Triangle (Gibbo), Yadah v Hwange (Baobab)
NgoMvulo
ZPC Kariba v Bulawayo Chiefs (National Sports Stadium)
