uMthunywa
Bongani Ndlovu
BEKUNGABIZWA ozwayo ngeSonto emini eFusini elokitshini elidala leMakokoba lapho akade kuhlangane abaculi bakoBulawayo bezokwazisa umphakathi ngomcimbi omkhulu wokudinga usizo lwezakhamizi zeChimanimani ezalahlekelwayo ngenxa yesiphepho sikaIdai.
Umcimbi omkhulu uzabe useCity Hall Car Park mhlaka 3 Nkwenkwezi emini.
Ekhuluma lephephandaba likazulu uAndrew Musoni ongumphathi wenhlanganiso yeHard Mashona uthe bona bayinhlanganiso entsha njalo bafisa ukudingela abalahlekelwa ngenxa yesiphepho sikaIdai uncedo.
“Umcimbi wangempelaviki ubungowokwazisa umphakathi ngomcimbi omkhulu ozayo ngenyanga ezayo.
“Sisakhulumisana lekhansili yakoBulawayo ukuthi isinike imvumo yokusebenzisa iCity Hall Car Park ngoba kungumcimbi wokudingela izimuli zeChimanimani imali ukuze zenelise ukuphinda zizimele empilweni,” kulandisa uMusoni.
Uthe bakhethe ukwenzela umcimbi lo elokitshini leMakokoba ngoba kulilokitshi elidala njalo elithwele imbali yonke yakoBulawayo.
“Ilokitshi leMakokoba liyinhliziyo yakoBulawayo. Kumcimbi weFusini besisazisa izakhamizi zakoBulawayo ngomsebenzi wenhlanganiso yethu lokuzethula emphakathini,” kuchaza uMusoni.
Uqhubekele phambili waveza ukuba umcimbi wangempelaviki uhambe kuhle kakhulu ngoba bekulabalandeli abanengi labahlabeli abanengi ababuyileyo.
“Ngaphandle kokuthi bekungela mali ekade ibhadalwa ukungena emcimbini bekulabantu abanengi akade bebuyile ukuzolandela abahlabeleli babo njalo abahlabeleli akade silabo bebefika i-15 batshaye kusukela emini laze latshona ilanga,” kuveza uMusoni.
Uphethe ngokuveza ukuthi umcimbi wangoLwesihlanu uzabe ulamabizo amakhulu kwezomculo ukuze izethekeli zithole ukukhwabitha isikhathi sabo.
“Umcimbi ozayo uzabe ulabahlabeleli abakhulu abafana laboAlbert Nyathi, Khuxxman, Mzoe 7 loHwindi President, lokho sikwenzela ukuthi abantu bakhwabithe isikhathi sabo njalo benelise lokukhipha izimali zabo bencedisa imuli zeChimanimani,” kuphetha uMusoni.
