uMthunywa
Thokozile Mbedzi
ZISAMANGELE izakhamizi zesigabeni seGuyu eGwanda ngemva kokuba amadoda amabili ethelele enye indoda ayigwaza ayibulala ngoba yale ukuthenga utshwala ngemali akade ilayo.
Umuyi uSamora Chuma obeleminyaka yokuzalwa engu-42 ufe ngoLwesithathu kuviki ephelileyo ngemva kokuhlaselwa ngamadoda amabili okungasatholakalanga amagama abo besola ukuthi kungani eyale ukuthi banathe yonke imali ayelayo esikhwameni ayeyithole ngemva kokuthengisa imbuzi yakhe.
Kubikwa ababili laba bazondela ukuthi kungani umuyi uChuma eyale ukuthenga utshwala ngemali yonke ayelayo ngoba esegcine eyempuphu.
Ekhuluma lentatheli kaMthunywa omunye umfakazi oqotho owayekhona oziveze ngokuthi Kiabetsho Lijaji uveze ukuthi bona bezwa laba abathathu bekhulumisana besithi kayinathwe yonke imali iphele ngoba labo ezabo ziyake zinathwe ziphele kodwa uChuma wala elokhu esithi kumele athenge impuphu ngaleyomali eseleyo.
“Besesilensuku ezimbili kudingwa uSamora engabonakali watholakala efile njalo kukhanya ukuthi wagwazwa ngengqamu. Abathathu laba basuka ezitolo lapho ababenathela khona bengasazwisisani kubangwa ukuthi kunathwe yonke imali okuyikho esicabangela ukuthi yikho abambulalela khona.
“Mina ngilusizi ngoba lemali ayelayo yayingamangalisi ngitsho ngoba sezwa ekhala ngokuthi yimali ayithola ngemva kokuthengisa imbuzi. Ekusukeni kwabo bambamba ngamandla njengabantu abangabangane akulamuntu owazihluphayo ukuba amncedise bengahambi laye loba abhule umlilo. Ngakho sithe sesisizwa ngokufa kwakhe sahle sacabangela ukuthi angabe wabulawa ngabangane bakhe.
“Isidumbu sikaChuma sesibonakele sabikela amapholisa ngalo,” kulandisa uMnu Lijaji.
Isikhulumi samapholisa esabelweni seMatabeleland South uInspector Philisani Ndebele ebuzwa ngodaba lolu uvumile wathi solufikile ewofisini yakhe.
“Udaba lwendoda ebuleweyo eGuyu solufikile ewofisini yethu njalo uzulu uyacetshiswa ukuba nxa kulokungazwisisani kumele baye emapholiseni loba ezinduneni loba osobhuku ngoba kucina kudala ukubulala njengodaba lolu.
“Sicela uzulu ongaba lolwazi labasolwa laba ababili azise amapholisa aseduzane ukuze bafinyelelwe yisandla somthetho,” kuphetha uInsp Philisani Ndebele.
